ബെംഗളൂരു: സംസ്ഥാന നിയമസഭയുടെ ശീതകാല സമ്മേളനത്തിനെതിരെ പ്രതിഷേധിച്ച മഹാരാഷ്ട്ര ഏകീകരണ സമിതി (എംഇഎസ്) പ്രവർത്തകരെ പോലീസ് കസ്റ്റഡിയിലെടുത്തു. ബെളഗാവിയിൽ പ്രതിഷേധം നടത്താൻ നേരത്തെ തന്നെ സമിതി അനുമതിക്ക് അപേക്ഷിച്ചിരുന്നെങ്കിലും ജില്ലാ ഭരണകൂടം ഇത് നിഷേധിച്ചിരുന്നു. തുടർന്ന് നിർദേശം വകവെക്കാതെ സംഭാജി സർക്കിളിൽ പ്രതിഷേധിച്ച 20ഓളം പ്രവർത്തകരെയാണ് കസ്റ്റഡിയിലെടുത്തത്.
ബെളഗാവി ഉൾപ്പെടെ മറാത്തി സംസാരിക്കുന്ന എല്ലാ പ്രദേശങ്ങളും മഹാരാഷ്ട്രയുമായി ലയിപ്പിക്കണമെന്നതാണ് പ്രതിഷേധക്കാരുടെ ആവശ്യം. എംഇഎസ് നേതാക്കളായ മനോഹർ കിനേക്കർ, ആർ.എം. പാട്ടീൽ, പ്രകാശ് ശിരോൽക്കർ, പ്രകാശ് മാർഗലെ തുടങ്ങിയവരെയും പോലീസ് കസ്റ്റഡിയിലെടുത്തു. ഇവർക്ക് മുന്നറിയിപ്പ് നൽകിയ ശേഷം വിട്ടയക്കുമെന്ന് പോലീസ് പറഞ്ഞു.
2006-ൽ കർണാടക സർക്കാർ ബെളഗാവിയിൽ നിയമസഭാ സമ്മേളനങ്ങൾ ആരംഭിച്ചതു മുതൽ ശീതകാല സമ്മേളനത്തിൻ്റെ ആദ്യ ദിവസം എംഇഎസ് മഹാമേള റാലി സംഘടിപ്പിക്കുന്നുണ്ട്.
നിരവധി തവണ മഹാരാഷ്ട്ര മന്ത്രിമാരോ എംപിമാരോ എംഎൽഎമാരോ രാഷ്ട്രീയ നേതാക്കളോ ഇത്തരം റാലികളെ അഭിസംബോധന ചെയ്തിട്ടുമുണ്ട്. ഈ വർഷം മഹാമേളയിൽ സംസാരിക്കാൻ മഹാരാഷ്ട്രയിൽ നിന്നുള്ള ഏതാനും നേതാക്കളെ ക്ഷണിച്ചതായി എംഇഎസ് നേതാക്കൾ അറിയിച്ചിരുന്നു. എന്നാൽ ജില്ലാ ഭരണകൂടം ഇതിന് അനുമതി നിഷേധിക്കുകയായിരുന്നു. അതിർത്തി ചെക്ക് പോസ്റ്റുകളിൽ ഡെപ്യൂട്ടി കമ്മീഷണർ മുഹമ്മദ് റോഷൻ നിരോധന ഉത്തരവുകളും പുറപ്പെടുവിച്ചിരുന്നു.
പ്രധാന ജംഗ്ഷനുകളിൽ പോലീസ് ഉദ്യോഗസ്ഥരെ നിയോഗിക്കുകയും ഡ്രോണുകളെ വിന്യസിക്കുകയും ചെയ്തിട്ടുണ്ട്. സമ്മേളനം അവസാനിക്കുന്നത് വരെ പോലീസ് സുരക്ഷ ശക്തമാക്കുമെന്ന് ജില്ലാ ഭരണകൂടം അറിയിച്ചു.
TAGS: KARNATAKA | WINTER SESSION
SUMMARY: Karnataka winter session, Police prevent MES rally in Belagavi
