ബെംഗളൂരു: നമ്മ മെട്രോയുടെ പർപ്പിൾ ലൈനിൽ വീണ്ടും സാങ്കേതിക തകരാർ. വ്യാഴാഴ്ച വൈകുന്നേരം 7.36ഓടെ വീണ്ടും സര്വീസ് തടസപ്പെട്ടു. കബ്ബൺ പാർക്ക് മെട്രോ സ്റ്റേഷനിൽ ഒരു മെട്രോ ട്രെയിനിന്റെ വാതിൽ ശരിയായി അടയാത്തതാണ് സർവീസിനെ ബാധിച്ചത്. മുൻകരുതൽ സുരക്ഷാ നടപടിയായി കബ്ബൺ പാർക്ക് മെട്രോ സ്റ്റേഷനിൽ യാത്രക്കാരെ സുരക്ഷിതമായി ഇറക്കി. ഇതോടെ അഞ്ച് ട്രെയിനുകളുടെ ഓട്ടം പാതിവഴിയിലായി. സാങ്കേതിക തകരാർ പരിഹരിച്ചതിന് ശേഷം സർവീസ് പൂർണമായി പുനഃസ്ഥാപിച്ചു. 17 മിനിറ്റാണ് വൈകിയത്. കബ്ബൺ പാക്കിന് പുറമേ വിധാന സൗധ, സെൻട്രൽ കോളേജ്, മജസ്റ്റിക്, റെയിൽവേ സ്റ്റേഷൻ മെട്രോ സ്റ്റേഷനുകളിലെ മെട്രോ ഇത് സർവീസുകളെ ബാധിച്ചു.
ചൊവ്വാഴ്ച വൈകുന്നേരം പർപ്പിൾ ലൈനിൽ സമാനമായ രീതിയിൽ മറ്റൊരു സാങ്കേതിക തകരാർ സംഭവിച്ചിരുന്നു. ‘കറന്റ് കളക്ടർ ഉപകരണത്തിലെ’ (CCD) തകരാറായിരുന്നു അന്ന് പ്രശ്നമായത്. തിരക്കേറിയ സമയത്തായതിനാൽ യാത്രക്കാർ മെട്രോയിൽ കുടുങ്ങിപ്പോയി. ബദൽ ഗതാഗതം തേടി യാത്രക്കാർക്ക് റോഡിലിറങ്ങേണ്ടി വന്നത് വലിയ ഗതാഗതക്കുരുക്കിന് കാരണമായിരുന്നു.
ബെംഗളൂരുവിൽ പ്രതിദിനം 9 മുതൽ 10 ലക്ഷം ആളുകളാണ് മെട്രോയെ യാത്രക്കായി ആശ്രയിക്കുന്നത്. 2024 ജനുവരി മുതൽ ബെംഗളൂരു മെട്രോയിൽ ഏകദേശം 20ഓളം സാങ്കേതിക തകരാറുകൾ റിപ്പോർട്ട് ചെയ്തിട്ടുണ്ട്. ഇതിൽ പർപ്പിൾ ലൈനിലാണ് കൂടുതൽ തകരാറുകൾ ഉണ്ടായിരിക്കുന്നത്.
SUMMARY: Metro Purple Line suffers another technical glitch; services delayed by 17 minutes
