തിരുവനന്തപുരം: മുട്ടില് മരംമുറി കേസില് പ്രതികരിച്ച് വനംമന്ത്രി ഷിബു ബേബി ജോണ്. കേസുമായി ബന്ധപ്പെട്ട് ഒരുപാട് ദുരൂഹതകളുണ്ടെന്ന് വനംമന്ത്രി ഷിബു ബേബി ജോണ്. ഏറ്റവും ഒടുവില് ലഭിച്ച ഇമെയില് പരാതിയില് ഗുരുതരമായ കാര്യങ്ങളാണുള്ളതെന്നും ഇതേക്കുറിച്ചെല്ലാം അന്വേഷിക്കേണ്ടതുണ്ടെന്നും മന്ത്രി പ്രതികരിച്ചു.
ഏതാനും ദിവസം മുമ്പ് ഒരു മാധ്യമപ്രവര്ത്തകന് മുട്ടില് മരംമുറിയുമായി ബന്ധപ്പെട്ട ഗൂഢാലോചനയ്ക്ക് സാക്ഷിയാണെന്നാണ് അതില് പറഞ്ഞിരിക്കുന്നതെന്നും ഷിബു ബേബി ജോണ് മാധ്യമങ്ങളോട് വ്യക്തമാക്കി. അന്നത്തെ ഒരു മാധ്യമത്തിന്റെ ഓഫീസിലേക്ക് മൂന്നുപേര് വരികയും, ഇയാള് കേട്ടുകൊണ്ടിരിക്കെ ചര്ച്ച നടത്തിയെന്നുമാണ് പരാതിയില് വ്യക്തമാക്കുന്നതെന്ന് മന്ത്രി പറഞ്ഞു.
ഇതിനെല്ലാം പിന്നീടാണ് മുന് ചീഫ് സെക്രട്ടറി ജയതിലകിന്റെ വിചിത്രമായ ഉത്തരവ് വന്നത്. ഇതിന് ആധാരമായ കാര്യങ്ങളെല്ലാം അവിടെ നിന്നാണ്. ഒരു അപേക്ഷ ചിലരില് നിന്നും കിട്ടുമ്പോള്, അതേപ്പറ്റിയുള്ള ചര്ച്ചയില് വ്യാപകമായ മരംമുറിക്ക് ഇടവരുത്തുമെന്ന് വനം വകുപ്പ്, റവന്യൂ ഉദ്യോഗസ്ഥര് പറഞ്ഞതായി മിനിറ്റ്സിലുണ്ട്. ആ മിനിറ്റ്സ് നിലനില്ക്കെയാണ് ജയതിലക് ഉത്തരവ് പുറപ്പെടുവിച്ചതെന്ന് മന്ത്രി പറഞ്ഞു.
മുട്ടില് മരംമുറിയുമായി ബന്ധപ്പെട്ട് വനംവകുപ്പ് അന്ന് സമര്പ്പിച്ച കുറ്റപത്രത്തില് വീഴ്ചയുണ്ടെങ്കില്, അതടക്കം പരിശോധിച്ച് കുറ്റമറ്റ നിലയിലുള്ള കുറ്റപത്രം സമര്പ്പിക്കാന് നടപടിയുണ്ടാകുമെന്ന് മന്ത്രി ഷിബു ബേബി ജോണ് അറിയിച്ചു. മരംമുറി അന്വേഷണത്തില് അട്ടിമറി ഉണ്ടായിട്ടുണ്ടോയെന്നും അന്വേഷിക്കുമെന്നും അദ്ദേഹം വ്യക്തമാക്കി.
SUMMARY: The conspiracy and official lapses in the Muttil tree-felling case will be investigated; Minister Shibu Baby John
