ആലപ്പുഴ: കേരളത്തില് ഇടത് സർക്കാരിന്റെ മൂന്നാമൂഴം സാധ്യമാകില്ലെന്ന് ഉറപ്പിച്ചു പറഞ്ഞ് അമ്പലപ്പുഴയിലെ സ്വതന്ത്ര സ്ഥാനാർത്ഥി ജി.സുധാകരൻ. പിണറായി വിജയൻ വീണ്ടും മുഖ്യമന്ത്രിയായാല് തനിക്ക് വ്യക്തിപരമായി സന്തോഷമേയുള്ളൂ, എന്നാല് നിലവിലെ രാഷ്ട്രീയ സാഹചര്യത്തില് ജനങ്ങള് എല്.ഡി.എഫിന് വോട്ട് നല്കില്ലെന്ന് അദ്ദേഹം വ്യക്തമാക്കി.
തന്റെ സ്ഥാനാർത്ഥിത്വത്തെ ‘പാർലമെന്ററി വ്യാമോഹം’ എന്ന് വിശേഷിപ്പിക്കുന്ന സി.പി.ഐ.എം നേതാക്കള്ക്കെതിരെ രൂക്ഷമായ ഭാഷയിലാണ് അദ്ദേഹം പ്രതികരിച്ചത്. “പിണറായി വിജയൻ മുഖ്യമന്ത്രിയായാല് സന്തോഷമുണ്ട്, പക്ഷെ മൂന്നാമൂഴം സഫലമാകില്ലെന്നാണ് ഞാൻ പറഞ്ഞത്. നിലവിലെ രാഷ്ട്രീയ സാഹചര്യത്തില് ജനം എല്.ഡി.എഫിന് വോട്ട് ചെയ്യില്ല.” വീണ്ടും മത്സരിക്കുന്ന എ.എം. ആരിഫ്, സജി ചെറിയാൻ, യു. പ്രതിഭ, വി.എൻ. വാസവൻ എന്നിവരെ സുധാകരൻ കടന്നാക്രമിച്ചു.
“ആരിഫ് ആലുവയില് പോയി മത്സരിക്കുന്നത് പാർലമെന്ററി വ്യാമോഹമല്ലേ? സജി ചെറിയാനും പ്രതിഭയും വാസവനും മൂന്നാം തവണയാണ് മത്സരിക്കുന്നത്. ഇതൊന്നും വ്യാമോഹമല്ലേ? ഇവരൊക്കെ കണ്ണടച്ചിരിക്കുകയാണ്.” താൻ ഒരു ജനകീയ സ്വതന്ത്രനാണെന്നും തന്നെ സഹായിക്കാൻ രാഷ്ട്രീയ പാർട്ടികള്ക്ക് മുന്നോട്ട് വരാമെന്നും അദ്ദേഹം പറഞ്ഞു. യു.ഡി.എഫ് പിന്തുണ നല്കിയാല് അത് സ്വീകരിക്കുമെന്നും സുധാകരൻ വ്യക്തമാക്കി.
SUMMARY: People will reject Pinarayi Vijayan’s third term: G Sudhakaran
WhatsApp
Telegram
