ബെംഗളൂരു: കർണാടകയിൽ നവംബർ ആദ്യ ദിവസങ്ങളിൽ കാലാവസ്ഥയിൽ മാറ്റമുണ്ടാകുമെന്ന് കാലാവസ്ഥാ വകുപ്പ് മുന്നറിയിപ്പ്. സംസ്ഥാനത്തിന്റെ വിവിധ മേഖലകളിൽ ഇടിമിന്നലോടുകൂടിയ മഴയ്ക്കും ചിലയിടങ്ങളിൽ ശക്തമായ കാറ്റിനും സാധ്യതയുണ്ട്.
ബെംഗളൂരു നഗരത്തിൽ ഇന്ന് പൊതുവെ മേഘാവൃതമായ കാലാവസ്ഥയും നേരിയ മഴയും പ്രതീക്ഷിക്കുന്നു. നഗരത്തിൽ വൈകുന്നേരം ഇടിമിന്നലോടുകൂടിയ മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. നഗരത്തിലെ കുറഞ്ഞ താപനില 20 ഡിഗ്രി സെൽഷ്യസും കൂടിയ താപനില 31 ഡിഗ്രി സെൽഷ്യസുമായിരിക്കും.
ഹാസൻ ജില്ലയിൽ നവംബർ 2 മുതൽ 4 വരെ ശക്തമായ മഴയ്ക്ക് സാധ്യതയുണ്ട്. ചിക്കമഗളൂരു, കുടക്, ശിവമൊഗ്ഗ തുടങ്ങിയ മലനാട് ജില്ലകളിലും മഴ മുന്നറിയിപ്പുണ്ട്. തീരദേശ കർണാടകയിലും വടക്കൻ ഉൾനാടൻ കർണാടകയിലും ഇന്നു മുതൽ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്നും നവംബർ 3ന് ചില പ്രദേശങ്ങളിൽ ശക്തമായ മഴ ലഭിക്കാമെന്നും മുന്നറിയിപ്പിൽ പറഞ്ഞു.
തെക്കൻ ഉൾനാടൻ കർണാടകയിൽ നവംബർ 2 മുതൽ 5 വരെ ശക്തമായ മഴയ്ക്കുള്ള സാധ്യതയുണ്ട്. ഇടിമിന്നലിനൊപ്പം മണിക്കൂറിൽ 30–40 കിലോമീറ്റർ വേഗതയിൽ കാറ്റ് വീശാനും സാധ്യതയുണ്ട്. ഇടിമിന്നലുള്ള സമയങ്ങളിൽ തുറസ്സായ സ്ഥലങ്ങളിലും മരങ്ങളുടെ ചുവട്ടിലും നിൽക്കരുത്. വൈദ്യുത തൂണുകൾ, ലൈനുകൾ, ജലാശയങ്ങൾ എന്നിവയുടെ സമീപത്ത് നിന്ന് മാറിനിൽക്കണം. വാഹന യാത്രക്കാർ കാലാവസ്ഥാ വകുപ്പിന്റെയും ദുരന്തനിവാരണ അധികൃതരുടെയും മുന്നറിയിപ്പുകൾ ശ്രദ്ധിക്കണമെന്നും നിർദേശമുണ്ട്.
SUMMARY: Rain warning issued for Karnataka, including Bengaluru; possibility of lightning and strong winds.
