തിരുവനന്തപുരം: സംസ്ഥാനത്തെ ഉന്നത പോലീസ് ഉദ്യോഗസ്ഥരുടെ തലപ്പത്ത് വൻ അഴിച്ചുപണി നടത്തിക്കൊണ്ട് സർക്കാർ ഉത്തരവിറങ്ങി. ഗതാഗത കമ്മീഷണർ സ്ഥാനത്തുനിന്നും സി.എച്ച്. നാഗരാജുവിനെ മാറ്റി പകരം ദക്ഷിണ മേഖലാ ഐ.ജി ജി. സ്പർജൻ കുമാറിനെ പുതിയ ഗതാഗത കമ്മീഷണറായി നിയമിച്ചു. സ്ഥാനം മാറിയ സി.എച്ച്. നാഗരാജുവിന് ഇന്റലിജൻസ് ഐ.ജിയുടെ സുപ്രധാന ചുമതലയാണ് സർക്കാർ നല്കിയിട്ടുള്ളത്.
ഇതോടെ ഒഴിവുവന്ന ദക്ഷിണ മേഖലാ ഐ.ജി പദവിയിലേക്ക് നിലവിലെ തിരുവനന്തപുരം റേഞ്ച് ഡി.ഐ.ജി ആർ. നിശാന്തിനിയെ പ്രമോഷനോടെ മാറ്റി നിയമിച്ചുകൊണ്ടുള്ള ഔദ്യോഗിക ഉത്തരവും ആഭ്യന്തര വകുപ്പ് പുറത്തിറക്കി. ഭരണസൗകര്യവും കാര്യക്ഷമതയും മുൻനിർത്തിയാണ് ഐ.പി.എസ് ഉദ്യോഗസ്ഥരുടെ ഈ സ്ഥലംമാറ്റ നടപടിയെന്നാണ് ഔദ്യോഗിക വിശദീകരണമെങ്കിലും, ഗതാഗത വകുപ്പിലെ പ്രവർത്തനങ്ങള് കൂടുതല് വേഗതയിലും ഏകോപനത്തോടെയും മുന്നോട്ടു കൊണ്ടുപോകുന്നതിനായി പുതിയൊരു കമ്മീഷണർ വേണമെന്ന ശക്തമായ നിലപാട് ഗതാഗത മന്ത്രി സി.പി. ജോണ് സ്വീകരിച്ചതിനെത്തുടർന്നാണ് പെട്ടെന്നുള്ള ഈ അഴിച്ചുപണിയെന്നാണ് റിപ്പോർട്ടുകള്.
മോട്ടോർ വാഹന വകുപ്പിന്റെ (എം.വി.ഡി) പ്രവർത്തനങ്ങള് കൂടുതല് സുതാര്യവും ജനസൗഹൃദവുമാക്കുന്നതിലും സേവനങ്ങള് പൂർണ്ണമായും ഡിജിറ്റലൈസ് ചെയ്യുന്നതിലും വലിയ പങ്കുവഹിച്ച ശേഷമാണ് സി.എച്ച്. നാഗരാജു പടിയിറങ്ങുന്നത്. അതേസമയം, ജനകീയ പോലീസ് ഉദ്യോഗസ്ഥൻ എന്ന നിലയില് ഭരണരംഗത്തും ക്രമസമാധാന പാലനത്തിലും മികച്ച പ്രവർത്തനപരിചയമുള്ള സീനിയർ ഐ.പി.എസ് ഓഫീസറായ ജി. സ്പർജൻ കുമാർ കമ്മീഷണറായി എത്തുന്നതോടെ
വകുപ്പിന്റെ ദൈനംദിന പ്രവർത്തനങ്ങളിലും റോഡ് സുരക്ഷാ നയങ്ങളിലും വലിയ രീതിയിലുള്ള മാറ്റങ്ങള് ഉണ്ടാകുമെന്നാണ് വിലയിരുത്തപ്പെടുന്നത്. ഉത്തരവ് പുറത്തിറങ്ങിയ സാഹചര്യത്തില് പുതിയ ഉദ്യോഗസ്ഥർ വരും ദിവസങ്ങളില് ചുമതലയേല്ക്കും.
SUMMARY: Reshuffle in top police ranks; G. Sparjan Kumar is the new Transport Commissioner
