ബെംഗളൂരു: സംസ്ഥാനത്തെ ജയിലുകളുടെ സുരക്ഷ കൂടുതല്‍ ശക്തമാക്കാന്‍ നൂതന സാങ്കേതിക സംവിധാനങ്ങള്‍ സ്ഥാപിക്കാന്‍ കര്‍ണാടക മന്ത്രിസഭ അനുമതി നല്‍കി. മുഖ്യമന്ത്രി ഡി.കെ. ശിവകുമാറിന്റെ അധ്യക്ഷതയില്‍ ചേര്‍ന്ന മന്ത്രിസഭാ യോഗത്തിലാണ് തീരുമാനം.
ജയിലുകളില്‍ കൃത്രിമബുദ്ധി അടിസ്ഥാനമാക്കിയ ക്യാമറകള്‍, പോര്‍ട്ടബിള്‍ സിഗ്‌നല്‍ ജാമറുകള്‍, തടവുകാര്‍ക്ക് നിയന്ത്രിതമായി ഫോണ്‍ വിളിക്കാനുള്ള സംവിധാനം എന്നിവ സ്ഥാപിക്കും. ജയിലിനുള്ളിലെ അനധികൃത പ്രവര്‍ത്തനങ്ങള്‍ കണ്ടെത്താനും മൊബൈല്‍ ഫോണ്‍ ഉപയോഗം നിയന്ത്രിക്കാനുമാണ് പുതിയ സംവിധാനങ്ങള്‍ ലക്ഷ്യമിടുന്നത്.
ബെംഗളൂരു പരപ്പന അഗ്രഹാര സെന്‍ട്രല്‍ ജയിലില്‍ തടവുകാരുടെ കൈവശം മൊബൈല്‍ ഫോണ്‍ കണ്ടെത്തിയ സംഭവങ്ങളുടെ പശ്ചാത്തലത്തിലാണ് സുരക്ഷാ സംവിധാനങ്ങള്‍ കൂടുതല്‍ ശക്തമാക്കാനുള്ള തീരുമാനം. മുന്‍ എം.പി. പ്രജ്വല്‍ രേവണ്ണയുടെ സെല്ലില്‍ നിന്ന് മൊബൈല്‍ ഫോണ്‍, ചാര്‍ജര്‍, പെന്‍ഡ്രൈവ് തുടങ്ങിയവ കണ്ടെത്തിയതിനെ തുടര്‍ന്ന് ജയില്‍ ഉദ്യോഗസ്ഥര്‍ക്കെതിരെയും നടപടി സ്വീകരിച്ചിരുന്നു.
സുരക്ഷ, നിരീക്ഷണം, ജയിലുകളുടെ പ്രവര്‍ത്തനക്ഷമത എന്നിവ മെച്ചപ്പെടുത്തുകയാണ് പുതിയ സംവിധാനങ്ങളുടെ ലക്ഷ്യമെന്ന് മന്ത്രി പ്രിയങ്ക് ഖാര്‍ഗെ അറിയിച്ചു.
SUMMARY:’ Security of prisons in Karnataka to be strengthened
