ബെംഗളൂരു: ബെംഗളൂരുവിൽ ഭാര്യയെ ഭർത്താവ് തലയ്ക്കടിച്ച് കൊന്നു. കഗ്ഗാലിപുര പോലീസ് സ്റ്റേഷൻ പരിധിയിലെ കുല്ലെഗൗഡനപാളയില് വെള്ളിയാഴ്ച രാത്രിയാണ് നാടിനെ നടുക്കിയ ഈ സംഭവം നടന്നത്. 21-കാരിയായ സിഞ്ചനയാണ് കൊല്ലപ്പെട്ടത്. കൊലപാതകത്തിന് ശേഷം രക്ഷപ്പെട്ട രേണുകയ്യ ഒളിവിലാണ്. രാത്രി മദ്യപിച്ചെത്തിയ രേണുകയ്യയും സിഞ്ചനയും തമ്മിലുണ്ടായ വാക്കുതർക്കമാണ് ക്രൂരമായ കൊലപാതകത്തിൽ കലാശിച്ചത്.
ഭാര്യയുടെ സ്വഭാവശുദ്ധിയെക്കുറിച്ച് രേണുകയ്യയ്ക്ക് കടുത്ത സംശയമുണ്ടായിരുന്നുവെന്നും ഇതിനെച്ചൊല്ലി ഇവർക്കിടയിൽ നിരന്തരം വഴക്കുണ്ടാകാറുണ്ടായിരുന്നുവെന്നും പോലീസ് പറഞ്ഞു. സംഭവദിവസം മദ്യലഹരിയിലായിരുന്ന പ്രതി വീടിന് മുന്നിലുണ്ടായിരുന്ന വലിയ കല്ലെടുത്ത് സിഞ്ചനയുടെ തലയ്ക്കടിക്കുകയായിരുന്നു. ഗുരുതരമായി പരുക്കേറ്റ യുവതി സംഭവസ്ഥലത്ത് വെച്ച് തന്നെ മരിച്ചു.
വിവരമറിഞ്ഞെത്തിയ കഗ്ഗാലിപുര പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി മാറ്റി. സംഭവത്തിൽ കേസെടുത്തതായും ഒളിവിലുള്ള പ്രതിയെ പിടികൂടാൻ അന്വേഷണം ഊർജിതമാക്കിയതായും പോലീസ് മാധ്യമങ്ങളോട് വ്യക്തമാക്കി.
SUMMARY: Suspecting his wife was having an affair; Husband kills 21-year-old woman
