ചെന്നൈ: തമിഴ്നാട്ടിലെ ഏറ്റവും പ്രായം കുറഞ്ഞ മന്ത്രി എസ്. കീർത്തനയ്ക്ക് സത്യപ്രതിജ്ഞ ചെയ്യാൻ സാധിച്ചില്ല. തിരഞ്ഞെടുപ്പ് സർട്ടിഫിക്കറ്റ് കയ്യില്‍ കരുതാഞ്ഞതാണ് വിനയായത്. സർട്ടിഫിക്കറ്റ് ഹാജരാക്കിയാലുടൻ അവർക്ക് സത്യപ്രതിജ്ഞ ചെയ്യാനാകും. തമിഴ്നാട് നിയമസഭാ പ്രിൻസിപ്പല്‍ സെക്രട്ടറി കെ. ശ്രീനിവാസൻ കീർത്തനയുടെ പേര് വിളിക്കുകയും സത്യപ്രതിജ്ഞയ്ക്കായി അവരെ ക്ഷണിക്കുകയും ചെയ്തു.
ഭരണഘടനാപരമായ നടപടിക്രമങ്ങളുടെ ഭാഗമായി ഹാജരാക്കേണ്ട തിരഞ്ഞെടുപ്പ് സർട്ടിഫിക്കറ്റ് കൈവശമില്ലാത്തതിനാല്‍ സത്യപ്രതിജ്ഞ അനുവദിക്കാനാവില്ലെന്ന് സെക്രട്ടറി കെ. ശ്രീനിവാസൻ വ്യക്തമാക്കി. കോണ്‍ഗ്രസിലെ അശോകൻ ജിയെ പരാജയപ്പെടുത്തി മിന്നുന്ന വിജയം നേടിയ കീർത്തനയെ മന്ത്രിസഭയിലെ ഒമ്പതാമത്തെ റാങ്കിലുള്ള മന്ത്രിയായാണ് നിശ്ചയിച്ചിരുന്നത്. സർട്ടിഫിക്കറ്റ് ഹാജരാക്കുന്ന മുറയ്ക്ക് ഇവർക്ക് പിന്നീട് സത്യപ്രതിജ്ഞ ചെയ്യാമെന്ന് അധികൃതർ അറിയിച്ചു.
SUMMARY: Tamil Nadu Minister S. Keerthana could not take oath due to lack of election certificate
