പൂനെ: മഹാരാഷ്‌ട്രയിലെ ബാരാമതി വിമാനത്താവളത്തിന് സമീപം ബുധനാഴ്ച വീണ്ടും വിമാനാപകടം. റെഡ്‌ബേര്‍ഡ് ഏവിയേഷന്റെ ഉടമസ്ഥതയിലുള്ള പരിശീലന വിമാനമാണ് ഗോജുബാവി ഗ്രാമപരിധിയില്‍ തകര്‍ന്നു വീണത്. വിമാനത്തിലുണ്ടായിരുന്ന ട്രെയിനി പൈലറ്റ് ഗുരുതരമായ പരുക്കുകളില്ലാതെ അത്ഭുതകരമായി രക്ഷപ്പെട്ടു.
പുനെ റൂറല്‍ പോലീസ് എസ്പി സന്ദീപ് സിംഗ് ഗില്‍ നല്‍കുന്ന വിവരങ്ങള്‍ പ്രകാരം രാവിലെ എട്ട് മണിയോടെയാണ് അപകടം നടന്നത്. താഴ്ന്ന് പറക്കുന്നതിനിടെ വിമാനത്തിന് സാങ്കേതിക തകരാര്‍ അനുഭവപ്പെടുകയായിരുന്നു. അടിയന്തര ലാന്‍ഡിംഗിന് ശ്രമിക്കുന്നതിനിടെ വിമാനത്തിന്റെ ഒരു ഭാഗം വൈദ്യുതി പോസ്റ്റില്‍ ഇടിക്കുകയും തുടര്‍ന്ന് നിലംപതിക്കുകയുമായിരുന്നു. സംഭവം നടന്ന ഉടന്‍ തന്നെ പോലീസും എമര്‍ജന്‍സി റെസ്‌ക്യൂ ടീമും സ്ഥലത്തെത്തി അന്വേഷണം ആരംഭിച്ചു.
പൈലറ്റ് സുരക്ഷിതനാണെന്നും കൂടുതല്‍ അന്വേഷണം നടന്നുവരികയാണെന്നും അധികൃതര്‍ വ്യക്തമാക്കി. കഴിഞ്ഞ ജനുവരിയില്‍ മഹാരാഷ്‌ട്ര ഉപമുഖ്യമന്ത്രിയായിരുന്ന അജിത് പവാര്‍ കൊല്ലപ്പെട്ട വിമാനാപകടം നടന്ന അതേ മേഖലയില്‍ തന്നെയാണ് ഇപ്പോഴത്തെ അപകടവും ഉണ്ടായിരിക്കുന്നത് എന്നത് മേഖലയിലെ വ്യോമയാന സുരക്ഷയെക്കുറിച്ച്‌ ആശങ്കയുയര്‍ത്തുന്നുണ്ട്.
ജനുവരി 28 ബുധനാഴ്ചയായിരുന്നു അജിത് പവാര്‍ സഞ്ചരിച്ച വിമാനം ബാരാമതി വിമാനത്താവളത്തില്‍ ഇറങ്ങുന്നതിനിടെ തകര്‍ന്നു വീണത്. അന്ന് അദ്ദേഹത്തോടൊപ്പം സുരക്ഷാ ഉദ്യോഗസ്ഥനും രണ്ട് ക്രൂ അംഗങ്ങളും ഉള്‍പ്പെടെ വിമാനത്തിലുണ്ടായിരുന്ന ആരും രക്ഷപ്പെട്ടിരുന്നില്ല. അടുത്തടുത്ത മാസങ്ങളില്‍ ഒരേ സ്ഥലത്തുണ്ടാകുന്ന വിമാനാപകടങ്ങളെക്കുറിച്ച്‌ ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ വിശദമായ അന്വേഷണം നടത്തിയേക്കും.
SUMMARY: Training plane crashes in Pune; pilot miraculously survives
