അമ്പലപ്പുഴ: നിയന്ത്രണംവിട്ട കാർ ബൈക്കിലിടിച്ചു. ബൈക്ക് യാത്രക്കാരായ രണ്ട് പെണ്‍കുട്ടികള്‍ പാലത്തില്‍നിന്ന് താഴെ വീണു. ദേശീയപാതയില്‍ കാക്കാഴം റെയില്‍വെ മേല്‍പ്പാലത്തില്‍ തിങ്കളാഴ്ച രാവിലെയായിരുന്നു അപകടം. കൊല്ലത്തുനിന്ന് എറണാകുളത്തെ സ്വകാര്യ ആശുപത്രിയിലേക്ക് ചികിത്സക്കായി പോയവർ സഞ്ചരിച്ച കാറാണ് എതിരെ വന്ന ബൈക്കിലിടിച്ചത്.
ബൈക്ക് ഓടിച്ചിരുന്ന വളഞ്ഞ വഴി കമ്പിവളപ്പ് രാഹുല്‍ (36), സഹോദരി പുത്രി ദേവ ദർശി (18), സുഹൃത്ത് ദിയ (18) എന്നിവർക്ക് ഗുരുതര പരുക്കേറ്റു. ഇടിയുടെ ആഘാതത്തില്‍ ദേവ ദർശി, ദിയ എന്നിവർ ബൈക്കില്‍ നിന്ന് തെറിച്ച്‌ പാലത്തിന് താഴെ വീണു. ഓടിക്കൂടിയ നാട്ടുകാർ മൂവരെയും ആലപ്പുഴ മെഡിക്കല്‍ കോളേജ് ആശുപത്രിയില്‍ എത്തിച്ചു. കാലിന് ഒടിവേറ്റ രാഹുലിനെയും ഗുരുതര പരുക്കേറ്റ ദേവദർശി, ദിയ എന്നിവരെയും പിന്നീട് സ്വകാര്യ ആശുപത്രിയിലേക്ക് മാറ്റി. കാർ യാത്രക്കാർക്ക് പരുക്കില്ല.
അപകടത്തെത്തുടർന്ന് ദേശീയപാതയില്‍ ഒരു മണിക്കൂറോളം ഗതാഗതം സ്തംഭിച്ചു. പിന്നീട് ക്രെയിനുപയോഗിച്ച്‌ കാർ പാലത്തില്‍ നിന്ന് നീക്കം ചെയ്ത ശേഷമാണ് ഗതാഗതം പുനഃസ്ഥാപിച്ചത്. ബൈക്ക് പൂർണമായി തകർന്നു. കാറിന്റെ മുൻ ഭാഗവും പൂർണമായി തകർന്നിട്ടുണ്ട്. അമ്പലപ്പുഴ റെയില്‍വേ സ്റ്റേഷനിലേക്ക് പോയതായിരുന്നു ബൈക്ക് യാത്രക്കാർ.
SUMMARY: Two girls fell from a bridge after a car collided with their bike
