വയനാട് മുണ്ടക്കൈ ഉരുള്പൊട്ടല് ദുരന്തത്തില് മരിച്ചവരുടെ എണ്ണം 361 ആയി. ദുരന്തം നടന്ന് അഞ്ചുനാള് പിന്നിടുമ്പോൾ ഇപ്പോഴും 206 പേർ കാണാമറയത്താണ്. 218 മൃതദേഹങ്ങളും 143 ശരീര ഭാഗങ്ങളുമാണ് ഇതുവരെ കണ്ടെത്താനായത്. അഞ്ചാം ദിനമായ ഇന്നും തിരച്ചില് മികച്ച രീതിയില് പുരോഗമിക്കുകയാണ്.
അതിനിടെ സൂചിപ്പാറയില് കുടുങ്ങിയ രക്ഷാപ്രവർത്തകരെ സൈന്യം എയർലിഫ്റ്റ് ചെയ്ത് ചൂരല്മലയിലെത്തിച്ചു. സന്നദ്ധസംഘടനയിലെ 3 പേരെയാണ് സൈന്യം രക്ഷപ്പെടുത്തിയത്. രക്ഷാപ്രവർത്തനത്തിനെത്തിയവർ ഉള്വനത്തിലുള്പ്പെടെ കുടുങ്ങുന്നത് കണക്കിലെടുത്ത് സൈന്യം മാത്രമായിരിക്കും ഇനി ഇവിടങ്ങളില് തിരച്ചില് നടത്തുക. നാട്ടുകാരുടെയും സന്നദ്ധപ്രവർത്തകരുടേയും സഹായം ഇനി മറ്റുള്ള പ്രദേശങ്ങളില് ഉപയോഗപ്പെടുത്തും.
വയനാട്ടിലെ ഉരുള്പൊട്ടല് ദുരന്തത്തില് മരണമടഞ്ഞവരുടെ ആശ്രിതര്ക്ക് ആശ്വാസ ധനസഹായം നല്കുന്നതിന് സംസ്ഥാന ദുരന്ത നിവാരണ പ്രതികരണ നിധിയില് നിന്ന് ജില്ലാ കളക്ടര്ക്ക് നാല് കോടി രൂപ അനുവദിച്ച് സര്ക്കാര് ഉത്തരവായി. സംസ്ഥാന ദുരന്ത പ്രതികരണ നിധിയുടെ മാനദണ്ഡ പ്രകാരമാണ് തുക വിനിയോഗിക്കേണ്ടത്.
TAGS : WAYANAD LANDSLIDE | DEATH
SUMMARY : Wayanad Tragedy; The death toll has reached 361
