തിരുവനന്തപുരം: കൊച്ചുവേളി ഇൻഡസ്ട്രിയൽ ഏരിയയിൽ വൻ തീപിടിത്തം (fire breakout). ഇവിടെ പ്രവർത്തിക്കുന്ന സൂര്യ പാക്സ് ഗോഡൗണിന് സമീപം കൂട്ടിയിട്ടിരുന്ന പ്ലാസ്റ്റിക് വസ്തുക്കൾക്കാണ് ആദ്യം തീപിടിച്ചത്. ഇത് ഗോഡൗണിലേക്കും പടരുകയായിരുന്നു. ഫയർഫോഴ്സ് യൂണിറ്റുകൾ സ്ഥലത്തെത്തി തീയണയ്ക്കാൻ ശ്രമം തുടരുകയാണ്. 12 ഫയർ ഫോഴ്സ് യൂണിറ്റുകളാണ് നിലവിൽ സ്ഥലത്തെത്തിയിരിക്കുന്നത്. തിരുവനന്തപുരം ജില്ലയിലെ എല്ലാ ഫയർഫോഴ്സ് യൂണിറ്റും കൊച്ചു വേളിയിലേക്ക് തിരിച്ചിട്ടുണ്ട്. വെളുപ്പിന് മൂന്നര മണിക്കാണ് തീപിടിത്തം ഉണ്ടായതെന്നാണ് റിപ്പോർട്ട്. തീ അണക്കാനുള്ള ശ്രമം തുടരുന്നു. അടുത്തുള്ള ടൈറ്റാനിയം ഫാക്ടറി, പെട്രോൾ പമ്പ് എന്നിവിടങ്ങളിലേക്ക് തീ പടരുന്നത് തടയാൻ സാധിച്ചു എന്നാണ് റിപ്പോർട്ട്.
അപകടത്തിൽ ആർക്കും ആളപായമില്ല. ഇൻഡസ്ട്രിയൽ ഏരിയയിൽ ഇതിനുമുൻപും നിരവധി തവണ തീപിടിത്തം ഉണ്ടായിട്ടുള്ളതായാണ് വിവരം. കെട്ടിടങ്ങളിൽ പലതും പ്ലാസ്റ്റിക് വസ്തുക്കൾ സൂക്ഷിക്കുന്ന സ്ഥലങ്ങളാണ്. ഇതാണ് തീ വളരെ വേഗം പടർന്നുപിടിക്കാൻ കാരണമായത്. സമീപത്തുള്ള മറ്റ് ഗോഡൗണുകളിലേക്കും തീപടരാനുള്ള സാധ്യത കണക്കിലെടുത്ത് തീ അണയ്ക്കാനുള്ള ശ്രമങ്ങൾ ഫയർഫോഴ്സ് തുടരുകയാണ്.
<br>
TAGS : KERALA | LATEST NEWS | FIRE BREAKOUT
SUMMARY : Huge fire in Kochuveli; The fire broke out in the plastic warehouse
