ബെംഗളൂരു: ബുക്ക് ബ്രഹ്‌മ സാഹിത്യോത്സവത്തില്‍ മലയാള വിഭാഗത്തില്‍ ഇന്ന് മൂന്ന് സെഷനുകള്‍ നടക്കും. വേദി അക്ഷരയില്‍ രാവിലെ 11 ന് നടക്കുന്ന മലയാള നാടകം – രചനയും ആവിഷ്കാരവും സെഷനില്‍ നാടക പ്രവര്‍ത്തകാരായ പ്രകാശ് ബാരെ, ജോസഫ് ജോൺ, അനിൽ തിരുമംഗലം എന്നിവര്‍ സംസാരിക്കും, കെ ആർ കിഷോർ മോഡറേറ്ററാകും
ഉച്ചക്ക് 1 മുതൽ 1.50 വരെ മഥനയില്‍ നടക്കുന്ന മലയാള ചെറുകഥ- വളർച്ചയും പുതിയ പ്രവണതകളും എന്ന സെഷനില്‍ എഴുത്തുകാരായ കെ പി രാമനുണ്ണി, അർഷാദ് ബത്തേരി, ആഷ് അഷിത എന്നിവര്‍ പങ്കെടുക്കും. ബ്രിജി കെ ടി മോഡറേറ്ററാകും.
വൈകിട്ട് 4 മുതൽ 4.50 വരെ മഥനയില്‍ നടക്കുന്ന സാഹിത്യ വിമർശനത്തിന്റെ വർത്തമാനത്തില്‍ ഇ പി രാജഗോപാലൻ, രാഹുൽ രാധാകൃഷ്ണൻ, സജയ് കെ വി എന്നിവര്‍ പങ്കെടുക്കും. രാഹുൽ എ ആർ മോഡറേറ്ററാകും.
വേദി അനാവരണയില്‍ ഇന്ന് മലയാളവുമായി ബന്ധപ്പെട്ട മൂന്നു പരിപാടികള്‍ നടക്കും. രാവിലെ 11.30ന് നടക്കുന്ന കഥാ പരിപാടിയില്‍ എഴുത്തുകാരന്‍ സക്കറിയ പങ്കെടുക്കും. 12.30 മുതൽ നടക്കുന്ന നീണ്ട കഥകൾ- മലയാളം സെഷനില്‍ എൻ.എസ്.മാധവൻ സംസാരിക്കും. തുടര്‍ന്ന് എൻ.എസ്.മാധവനും ടി പി വിനോദുമായുള്ള സംഭാഷണം നടക്കും. വൈകിട്ട് 3.30 മുതൽ ജ്ഞാനഭാരം എന്ന കൃതിയെ വിലയിരുത്തി നടക്കുന്ന പരിപാടിയില്‍ രചയിതാവ് ഇ. സന്തോഷ് കുമാർ, ടോണി സേവ്യര്‍, രാഹുൽ രാധാകൃഷ്ണന്‍ എന്നിവര്‍ പങ്കെടുക്കും.
ഇത്തവണത്തെ സാഹിത്യോത്സവത്തിൽ മലയാള വിഭാഗങ്ങളിലടക്കം അത്യപൂർവ്വമായ ജനത്തിരക്കാണ് അനുഭവപ്പെടുന്നത്. വായനക്കാരുടെയും സാഹിത്യാസ്വാദകരുടെയും സജീവ പങ്കാളിത്തം മേളയ്ക്ക് മാറ്റുകൂട്ടി. സാഹിത്യ ചർച്ചകൾക്ക് പുറമെ വൈവിധ്യമാർന്ന സാംസ്കാരിക പരിപാടികളും, പുസ്തകശാലകളും ഫ്ലീ മാർക്കറ്റുമെല്ലാം മേളയെ കൂടുതൽ ആകർഷമാക്കുന്നുണ്ട്.
SUMMARY: Book Brahma Literary Festival; Zakaria and KP Ramanunni to participate today
