മനാമ: ബഹ്റൈനില് സ്ഫോടനങ്ങളും അപായസൈറണുകളും മുഴങ്ങി. ബഹ്‌റൈന്റെ അല്‍ റിഫാ ഹെലികോപ്റ്റർ താവളത്തിലെ യുഎസ് റഡാർ സംവിധാനത്തിന് നേരെ ആറ് ഡ്രോണുകള്‍ ഉപയോഗിച്ച്‌ ആക്രമണം നടത്തിയെന്നാണ് ഇറാന്റെ വാദം. രാജ്യത്തെ യുഎസ് സൈനിക താവളത്തിന് നേരെ ഡ്രോണ്‍ ആക്രമണം നടത്തിയതായി ഇറാന്റെ റെവല്യൂഷണറി ഗാർഡ്സ് അവകാശപ്പെട്ടു.
എന്നാല്‍, ആക്രമണങ്ങള്‍ ലക്ഷ്യത്തിലെത്തുന്നതിന് മുമ്പ് വ്യോമപ്രതിരോധ സംവിധാനം തടഞ്ഞതായി ബഹ്‌റൈൻ പ്രതിരോധ സേന അറിയിച്ചു. ജനങ്ങളോട് സുരക്ഷിത കേന്ദ്രങ്ങളിലേക്ക് മാറാനും അധികൃതർ നിർദേശിച്ചു. പുലർച്ചെ നാലോടെയും രാവിലെ 6.30ഓടെയും സ്ഫോടനശബ്ദങ്ങള്‍ കേട്ടതായി പ്രദേശവാസികളെ ഉദ്ധരിച്ച്‌ എഎഫ്പി റിപ്പോർട്ട് ചെയ്തു. ജനങ്ങള്‍ ശാന്തരായിരിക്കണമെന്നും അടുത്തുള്ള സുരക്ഷിത കേന്ദ്രങ്ങളിലേക്ക് മാറണമെന്നും ഔദ്യോഗിക അറിയിപ്പുകള്‍ പിന്തുടരണമെന്നും ആഭ്യന്തര മന്ത്രാലയം നിർദേശിച്ചു.
അതേസമയം, ഹോർമുസ് കടലിടുക്ക് അടച്ചിരിക്കുകയാണെന്നും അമേരിക്കയുടെ ഭാഗത്തുനിന്നുള്ള ഏത് ആക്രമണത്തിനും ശക്തമായ തിരിച്ചടി നല്‍കുമെന്നും ഇറാൻ മുന്നറിയിപ്പ് നല്‍കി. എട്ടുമാസമായി തുടരുന്ന യുദ്ധത്തിനിടെ ഗള്‍ഫ് മേഖലയിലെ വിമാനത്താവളങ്ങള്‍, തുറമുഖങ്ങള്‍, ഊർജ കേന്ദ്രങ്ങള്‍, യുഎസ് സൈനിക കേന്ദ്രങ്ങള്‍ എന്നിവയ്ക്ക് നേരെ ഇറാൻ ആക്രമണം നടത്തിയിട്ടുണ്ട്. ഫെബ്രുവരി 28ന് അമേരിക്കയും ഇസ്രയേലും ഇറാനെതിരെ നടത്തിയ ആക്രമണങ്ങളോടെയാണ് യുദ്ധം ആരംഭിച്ചത്.
വെള്ളിയാഴ്ചയും ബഹ്‌റൈനിലെ യുഎസ് മുന്നറിയിപ്പ് റഡാർ സംവിധാനത്തിന് നേരെ ആക്രമണം നടത്തിയതായി ഇറാൻ അവകാശപ്പെട്ടിരുന്നു. രണ്ട് ഇറാനിയൻ ഡ്രോണുകള്‍ വെടിവച്ചിട്ടതായി യുഎസ് സൈന്യവും അറിയിച്ചു. ആക്രമണത്തില്‍ ആളപായമോ നാശനഷ്ടങ്ങളോ ഉണ്ടായിട്ടില്ലെന്ന് യുഎസ് സെൻട്രല്‍ കമാൻഡ് വ്യക്തമാക്കി.
SUMMARY: Another Iranian drone attack in Bahrain; high-alert warning issued
