കൊച്ചി: കേരള കോൺഗ്രസ് നേതാവും മുൻ മന്ത്രിയുമായ ടി.യു.കുരുവിള (90) അന്തരിച്ചു. കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. വാർധക്യസഹജമായ അസുഖങ്ങളെ തുടർന്ന് ഏറെനാളായി ചികിത്സയിലായിരുന്നു.. വി.എസ് മന്ത്രിസഭയിൽ പൊതുമരാമത്ത് മന്ത്രിയായിരുന്നു. 2006, 2011 വർഷങ്ങളിൽ കോതമംഗലത്തുനിന്ന് നിയമസഭയിലെത്തി.
2006-ലെ വി.എസ്. അച്യുതാനന്ദൻ സർക്കാരിൽ ഒരുകൊല്ലത്തോളം പൊതുമരാമത്ത് വകുപ്പ് കെെകാര്യം ചെയ്തിരുന്നു. 2006-ൽ പി.ജെ. ജോസഫ് രാജിവെച്ചതിനെ തുടർന്നാണ് മന്ത്രിപദത്തിലെത്തിയത്. എന്നാൽ ഒരുകൊല്ലത്തിനുശേഷം രാജകുമാരി ഭൂമിയിടപാട് വിവാദത്തിന് പിന്നാലെ കുരുവിള രാജിവെച്ചു.
കോതമംഗലത്തെ ഊഞ്ഞപ്പാറ സ്വദേശിയായ ടി.യു. കുരുവിള 1936 സെപ്റ്റംബർ 13-നാണ് ജനിച്ചത്. ഉതുപ്പും മറിയവുമായിരുന്നു മാതാപിതാക്കൾ. 1964 മുതൽ 1978 വരെ കീരമ്പാറ പഞ്ചായത്ത് പ്രസിഡന്റ് ആയിരുന്നു. പ്ലാന്റേഷൻ കോർപറേഷൻ (1982-87), കേരള ഹൗസിങ് ബോർഡ് (1996-2001) എന്നിവയുടെ ചെയർമാൻ സ്ഥാനം വഹിച്ചിട്ടുണ്ട്.
SUMMARY: Former Minister T.U. Kuruvila passed away
