പാലക്കാട്: പാലക്കാട് കെഎസ്‌ആര്‍ടിസി ഡിപ്പോയില്‍ നിന്ന് ബസ് മോഷ്ടിച്ച സംഭവത്തില്‍ പ്രതിയെ പോലിസ് അറസ്റ്റ് ചെയ്തു. മേപ്പറമ്പ് സ്വദേശിയായ ഫാസിലാണ് പാലക്കാട് ടൗണ്‍ സൗത്ത് പോലിസിന്റെ പിടിയിലായത്. പ്രതിയെ ഇന്ന് വൈകിട്ട് തെളിവെടുപ്പിനായി സംഭവസ്ഥലങ്ങളില്‍ എത്തിക്കുമെന്ന് പോലിസ് അറിയിച്ചു. കഴിഞ്ഞ ഞായറാഴ്ച പുലര്‍ച്ചെയായിരുന്നു സംഭവം.
ഡിപ്പോയ്ക്ക് പുറത്തുള്ള പ്രധാന റോഡരികില്‍ പാര്‍ക്ക് ചെയ്തിരുന്ന കെഎസ്‌ആര്‍ടിസിയുടെ ഓര്‍ഡിനറി ബസ്സാണ് പ്രതി സ്റ്റാര്‍ട്ട് ചെയ്ത് കൊണ്ടുപോയത്. പുലര്‍ച്ചെ അഞ്ചു മണിയോടെയാണ് സര്‍വീസിനായി നിര്‍ത്തിയിട്ടിരുന്ന ബസ് കാണാതായ വിവരം ഡ്യൂട്ടിയിലുണ്ടായിരുന്ന ജീവനക്കാരുടെ ശ്രദ്ധയില്‍പ്പെട്ടത്. തുടര്‍ന്ന് കെഎസ്‌ആര്‍ടിസി ജീവനക്കാര്‍ ഉടന്‍ തന്നെ മറ്റു വാഹനങ്ങളില്‍ ബസ്സിനെ പിന്തുടര്‍ന്നു. ജീവനക്കാര്‍ പിന്നാലെയുണ്ടെന്ന് തിരിച്ചറിഞ്ഞ പ്രതി പിടിയിലാകുമെന്ന ഭയത്തില്‍ നഗരത്തിലെ മംഗളം ടവറിന് സമീപം റോഡരികില്‍ ബസ് ഉപേക്ഷിച്ച ശേഷം രക്ഷപ്പെടുകയായിരുന്നു.
SUMMARY: Palakkad KSRTC bus theft: Suspect arrested
