ബെംഗളൂരു: ബെംഗളൂരു നഗരത്തിലെ ഗതാഗതകുരുക്കിന് ആശ്വാസമായി പുതിയ മേല്പ്പാലം. ഓൾഡ് മദ്രാസ് റോഡിലെ സ്വാമി വിവേകാനന്ദ റോഡ് മെട്രോ സ്റ്റേഷൻ മുതൽ ഹൊസൂർ റോഡിലെ സിൽക്ക് ബോർഡ് ജംക്ഷൻ വരെയുള്ള പുതിയ 11.62 കിലോമീറ്റർ മേൽപാലത്തിന്റെ നിർമാണ നടപടികൾക്ക് തുടക്കമിട്ട് ബെംഗളൂരു സ്മാർട്ട് ഇൻഫ്രാസ്ട്രക്ചർ ലിമിറ്റഡ് (ബി സ്മൈൽ). 1300 കോടിരൂപ ചെലവ് പ്രതീക്ഷിക്കുന്ന മേൽപാലം ഡൊംലൂർ, കോറമംഗല, മടിവാള മേഖലകളെ ബന്ധിപ്പിച്ചാണു കടന്നുപോകുന്നത്. ഡൊംലൂർ മേൽപാലത്തിലേക്കു റാംപും നിർമിക്കും. അടുത്ത 2 വർഷം കൊണ്ട് നിർമാണം പൂർത്തിയാക്കാനാണ് ലക്ഷ്യമിടുന്നത്.
ഹൊസൂർ റോഡിലും ഓൾഡ് മദ്രാസ് റോഡിലും വാഹനങ്ങൾക്ക് തടസ്സമില്ലാതെ സഞ്ചരിക്കാൻ കഴിയുന്ന തരത്തിലാണ് പദ്ധതിയുടെ അലൈൻമെന്റ് രൂപകൽപ്പന ചെയ്തിരിക്കുന്നതെന്ന് ബി-സ്മൈൽ ഡയറക്ടർ (ടെക്നിക്കൽ) ബി.എസ്. പ്രഹല്ലാദ് പറഞ്ഞു. ഇതിനായുള്ള വിശദമായ പദ്ധതി രേഖ (ഡിപിആർ) നേരത്തെ പൂർത്തിയാക്കിയിരുന്നു. സിൽക്ക് ബോർഡ് ജംഗ്ഷനിൽ, മെട്രോ ലൈനുമായി സംയോജിപ്പിച്ച ഒരു ഡബിൾ ഡെക്കർ ഫ്ലൈഓവറും ഉൾപ്പെടുന്നുണ്ട്. ഇന്ദിരാനഗറിലെ 80 ഫീറ്റ് റോഡ്, സിഎംഎച്ച് റോഡ്, 100 ഫീറ്റ് റോഡ് എന്നിവയിലൂടെ കടന്നുപോകുകയും തുടർന്ന് മഡിവാലയിലേക്ക് എത്തിച്ചേരുമെന്നും ഡിപിആറില് പറയുന്നു.
SUMMARY: New flyover connecting Old Madras Road and Hosur Road in Bengaluru
