ഡല്‍ഹി: ഡല്‍ഹിയില്‍ നടക്കുന്ന വിദ്യാർഥി പ്രക്ഷോഭങ്ങള്‍ക്ക് ആത്മബന്ധവും ഐക്യദാർഢ്യവും പ്രഖ്യാപിച്ച് നടനും സംവിധായകനുമായ മോഹൻലാലിന്റെ മകള്‍ വിസ്മയ മോഹൻലാല്‍. ‘വില്‍ മേക്ക് ഇറ്റ് എസ്.കെ’ (Will Make It SK) എന്ന ഇൻസ്റ്റഗ്രാം പേജില്‍ പങ്കുവെച്ച പ്രത്യേക കുറിപ്പ് സ്വന്തം ഇൻസ്റ്റഗ്രാം സ്റ്റോറിയാക്കിയാണ് വിസ്മയ തന്റെ പിന്തുണ അറിയിച്ചത്.
വിദ്യാർഥികളുടെ അവകാശങ്ങള്‍ക്കും നീതിക്കും വേണ്ടിയുള്ള പോരാട്ടങ്ങളെ പിന്തുണയ്ക്കുന്ന രീതിയിലുള്ള കുറിപ്പാണ് വിസ്മയ പങ്കുവെച്ചിരിക്കുന്നത്. വസ്ത്രധാരണത്തിലൂടെയും കലയിലൂടെയും ആശയങ്ങള്‍ പങ്കുവെക്കുന്ന ‘വില്‍ മേക്ക് ഇറ്റ് എസ്.കെ’ എന്ന പേജിലെ പോസ്റ്റ് ചുരുങ്ങിയ സമയത്തിനുള്ളില്‍ തന്നെ സമൂഹമാധ്യമങ്ങളില്‍ ശ്രദ്ധനേടി.
പോസ്റ്റിന്റെ പൂർണ്ണരൂപം;
ടിയര്‍ ഗാസ്, ലാത്തി ചാര്‍ജ്, പരുക്കേറ്റ വിദ്യാര്‍ത്ഥികള്‍, റോഡ് ബ്ലോക്ക് ചെയ്തിരിക്കുന്നു, മെട്രോ സ്‌റ്റേഷനുകള്‍ അടച്ചിട്ടിരിക്കുന്നു. നഗരത്തിലാകാതെ കനത്ത ബാരിക്കേഡുകള്‍. ഇന്‍റര്‍നെറ്റ് നിരോധനം. പ്രതിഷേധക്കാര്‍ പറയുന്നത് അംഗീകരിക്കണം എന്നില്ല. അവരുടെ ആവശ്യങ്ങള്‍ പിന്തുണയ്ക്കണമെന്നില്ല. ഭാഗമായ സംഘടനകളെ ഇഷ്ടപ്പെടണം എന്നു പോലുമില്ല.
പക്ഷെ പൊതുജനം ശബ്ദുമുയര്‍ത്തുമ്പോള്‍ ചര്‍ച്ചയ്ക്ക് പകരം ബലപ്രയോഗം ആണ് മറുപടിയെങ്കില്‍, എന്ത് തരം ജനാധിപത്യമായി മാറിക്കൊണ്ടിരിക്കുകയാണ് നമ്മളെന്ന് നമ്മളെല്ലാവരും ചോദിക്കണം.
കാരണം നാളെ നിങ്ങളായിരിക്കാം ശബ്ദമുയര്‍ത്തുന്നത്. നിങ്ങളുടെ നഗരമായിരിക്കാം. നിങ്ങളുടെ അയല്‍പക്കമായിരിക്കാം. നിങ്ങളുടെ സ്വന്തം കുടുംബമായിരിക്കാം. നിങ്ങളെല്ലാവരോടുമുള്ള എന്‍റെ ചോദ്യം വളരെ ലളിതമാണ്. തങ്ങളുടെ പൗരന്മാരോട് ഒരു ജനാധിപത്യ രാജ്യം പ്രതികരിക്കേണ്ടത് ഇങ്ങനെയാണോ?
SUMMARY: Vismaya Mohanlal extends support to the student protests in Delhi
