ജക്കാർത്ത: മോശം കാലാവസ്ഥയ്ക്കിടെ ഇന്തോനേഷ്യയിൽ യാത്രാകപ്പൽ അപകടത്തിൽപ്പെട്ട് ആറ് പേർ മരിച്ചു. 97 പേരെ രക്ഷപ്പെടുത്തി. കാണാതായ ‘ദ വെർഗോ ട്രാൻസ്പോർട്ട് 8’ എന്ന കപ്പലിനായുള്ള രക്ഷാപ്രവർത്തനം തുടരുകയാണ്. 243 യാത്രക്കാരുമായി ബഞ്ചർമാസിലേക്ക് പോകുകയായിരുന്ന കപ്പലുമായുള്ള ബന്ധം ഇന്ന് പുലർച്ചെ ജാവ കടലിൽവെച്ചാണ് നഷ്ടമായത്. ശനിയാഴ്ച പ്രാദേശിക സമയം രാവിലെ 10.30നാണ് കിഴക്കൻ ജാവയിൽ നിന്ന് തെക്കൻ കലിമന്താൻ പ്രവിശ്യയിലേക്ക് കപ്പൽ യാത്ര തിരിച്ചത്.
മോശം കാലാവസ്ഥയെ തുടർന്നാണ് കപ്പലുമായുള്ള ബന്ധം നഷ്ടമായതെന്നാണ് പ്രാഥമിക നിഗമനം. ബൻജർമാസിനിലെ തുറമുഖത്തുനിന്ന് ഏകദേശം 148 കിലോമീറ്റർ അകലെയായിരുന്നു കപ്പൽ. ബന്ധം നഷ്ടപ്പെട്ട് ഏകദേശം രണ്ട് മണിക്കൂറിന് ശേഷമാണ് രക്ഷാസേനയ്ക്ക് സംഭവത്തെക്കുറിച്ച് ഔദ്യോഗിക വിവരം ലഭിച്ചത്. തുടർന്ന് സമീപത്തുണ്ടായിരുന്ന കപ്പലുകളുടെ സഹായത്തോടെ രക്ഷാപ്രവർത്തനം ആരംഭിച്ചു.
അപകടത്തിന്റെ കൃത്യമായ കാരണം അധികൃതർ സ്ഥിരീകരിച്ചിട്ടില്ല. കപ്പൽ മുങ്ങിയതാണോ മറിഞ്ഞതാണോ എന്നതടക്കമുള്ള കാര്യങ്ങളിൽ അന്വേഷണം തുടരുകയാണ്.
SUMMARY: Bad weather: Ship carrying 243 people meets with accident in Indonesia; 6 dead.
