ചെന്നൈ: സ്വർണവും പണവും പ്രദർശിപ്പിച്ച് വീഡിയോയിട്ടതിന് പിന്നാലെ യൂട്യൂബറുടെ വീട്ടിലെ 118 പവൻ കവർന്ന സംഭവത്തിൽ നാല് പേർ പിടിയിൽ. ശ്രീവൈകുണ്ഠം സ്വദേശി ഇസക്കി പാണ്ടി (30), മുരുകൻ (28), ആലംകുളം സ്വദേശി മുരുകേശൻ (30), തിമ്മരാജപുരം സ്വദേശി തങ്കപാണ്ടി (39) എന്നിവരെയാണ് തമിഴ്നാട് രാജഗമംഗലം പോലീസ് അറസ്റ്റ് ചെയ്തത്.
സെപ്തംബര്‍ 24നാണ്‌ യുട്യൂബറും ഇൻഫ്ലുവൻസറുമായ മധുമിതയുടെ വീട്ടിൽ മോഷണം നടന്നത്. വീട്ടുകാര്‍ പുറത്തുപോയ സമയത്ത് വീടിന്റെ പിന്‍വാതില്‍ തകര്‍ത്താണ്‌ സംഘം അകത്തുകടന്നത്‌. ഒരു കോടിയോളം രൂപയുടെ സ്വര്‍ണ, വജ്ര ആഭരണങ്ങളും 50,000 രൂപയും മോഷ്ടിച്ചു.
സിസിടിവികൾ ഉൾപ്പെടെ സ്ഥാപിച്ചിട്ടുള്ള, അതീവ സുരക്ഷാ മേഖലയിൽ താമസിക്കുന്ന ഇവരുടെ വീടിന്റെ പിൻവാതിൽ തകർത്താണ് മോഷ്ടാക്കൾ വീട്ടിനുള്ളിൽ പ്രവേശിച്ചത്. സിസിടിവിയും, ഫോൺകോളുകളും ഉൾപ്പെടെ കേന്ദ്രീകരിച്ചുള്ള അന്വേഷണത്തിൽ പോലീസിനു പ്രതികളുടെ വിവരം ലഭിച്ചു. 160 സിസിടിവി ദൃശ്യങ്ങളും 35 സിഡിആര്‍ രേഖകളും പോലീസ് പരിശോധിച്ചു. സാങ്കേതിക തെളിവുകളുടെ അടിസ്ഥാനത്തിലാണ് പ്രതികളെ പിടികൂടിയത്. കഴിഞ്ഞ ആറ് മാസമായി മധുമിത പോസ്റ്റ് ചെയ്ത വീഡിയോകൾ കണ്ട ശേഷമാണ് അവർ കവർച്ച ആസൂത്രണം ചെയ്തത്. കാർ ഇല്ലെങ്കിൽ വീട്ടിൽ ആരും ഉണ്ടാകില്ലെന്ന് അവർ ഉറപ്പുവരുത്തിയെന്നും പോലീസ് പറഞ്ഞു.
യുട്യൂബിലും ഇന്‍സ്റ്റഗ്രാമിലുമായി 4.5 ലക്ഷത്തോളം ഫോളോവേഴ്സ് ഉള്ളയാളാണ് മധുമിത. കെട്ടുകണക്കിന് പണവും സ്വര്‍ണാഭരണങ്ങളും കാണിച്ച് ആഡംബര ജീവിതത്തിന്റെ വീഡിയോകളും റീലുകളുമാണ് പ്രധാനമായും പങ്കുവച്ചിരുന്നത്. കുട്ടിയെ പണംകൊണ്ട് മൂടുന്നതരത്തിലുള്ള വീഡിയോകളുമിട്ടിരുന്നു. ഇത്തരം റീലുകൾ കണ്ടാണ്‌ മോഷ്ടാക്കള്‍ കവര്‍ച്ച ആസൂത്രണം ചെയ്തതെന്ന്‌ രാജഗമംഗലം പോലീസ് പറഞ്ഞു. കേസില്‍ കൂടുതല്‍ പേര്‍ക്ക് പങ്കുണ്ടോയെന്നും അന്വേഷിക്കുന്നുണ്ട്‌. മധുമിതയുടെ ഭർത്താവ്‌ വിനോദ് കുമാറും യുട്യൂബറാണ്‌.
SUMMARY: Four arrested for burglary at YouTuber’s home; 98 sovereigns of gold recovered.
