മുംബൈ: മഹാരാഷ്ട്രയിലെ റായ്ഗഡ് ജില്ലയിലെ പ്രശസ്ത വിനോദസഞ്ചാര കേന്ദ്രമായ ദിവേഗർ ബീച്ചിൽ ശക്തമായ കടൽക്ഷോഭത്തിൽപ്പെട്ട് എട്ട് വിദ്യാർഥികൾ മുങ്ങിമരിച്ചു. പൂനെയിലെ സ്വകാര്യ കോച്ചിങ് സെന്ററിലെ 11,12 ക്ലാസുകളിലെ വിദ്യാർഥികളാണ് അപകടത്തിൽപ്പെട്ടത്. തന്മയ് ദത്താത്രേയ വാഹിലെ, സുമിത് ഭാരത് അഹിർ, പ്രണവ് രാംദാസ് ബൻസോഡെ, കൈവല്യ സതീഷ് വാസൻകർ, രാജ്‌വീർ യുവരാജ് വാഹിലെ, യാഷ് കിരൺ വാങ്കഡെ, സോഹം തുക്കാറാം ഭണ്ട്വാൾക്കർ, കൗസ്തുഭ് സന്ദീപ് ദൗണ്ട് എന്നിവരാണ് മരിച്ചത്.
വിനോദയാത്രയുടെ ഭാഗമായി ഏകദേശം 170 കിലോമീറ്റർ സഞ്ചരിച്ചാണ് പൂനെ ജില്ലയിലെ അലണ്ടിയിലുള്ള ‘വിന്നേഴ്സ് അക്കാദമി’ എന്ന സ്വകാര്യ കോച്ചിംഗ് സെന്ററിൽ നിന്നുള്ള 48 അംഗ സംഘം ദിവേആഗറിലെത്തിയത്. 25 ആൺകുട്ടികളും 17 പെൺകുട്ടികളും 6 അധ്യാപകരും അടങ്ങുന്നതായിരുന്നു സംഘം.
വൈകുന്നേരം 5.30 ഓടെ കടൽത്തീരത്തെത്തിയ വിദ്യാർഥികളിൽ എട്ടുപേർ കടലിലിറങ്ങുകയായിരുന്നു. വെള്ളത്തിന്റെ ആഴവും കടലിലെ ശക്തമായ ഒഴുക്കും കൃത്യമായി മനസ്സിലാക്കാൻ കഴിയാതെ പോയതാണ് കുട്ടികൾ ഒഴുക്കിൽപ്പെടാൻ കാരണമായതെന്ന് പൊലീസ് അറിയിച്ചു.
അപകടം നടന്ന ഉടൻ തന്നെ നാട്ടുകാർ വിദ്യാർഥികളെ രക്ഷിക്കാൻ ശ്രമിച്ചെങ്കിലും സാധിച്ചില്ല. തുടർന്ന് എട്ടുപേരുടെയും മൃതദേഹങ്ങൾ കടലിൽ നിന്ന് കണ്ടെടുക്കുകയായിരുന്നു.
വിവരമറിഞ്ഞ് ദിഗി സാഗരി ബോർലി പഞ്ചതൻ പൊലീസ് സ്റ്റേഷനിലെ അസിസ്റ്റന്റ് പോലീസ് ഇൻസ്പെക്ടർ സന്തോഷ് ആവതിയും സംഘവും സ്ഥലത്തെത്തി. മൃതദേഹങ്ങൾ പോസ്റ്റ്‌മോർട്ടം നടപടികൾക്കായി ബോർലി പഞ്ചതനിലെ പ്രാഥമിക ആരോഗ്യ കേന്ദ്രത്തിലേക്ക് മാറ്റി.
SUMMARY: Eight students who had come to the beach for an excursion drowned.
