തിരുവനന്തപുരം: ഫുട്‌ബോള്‍ താരം ലയണല്‍ മെസ്സിയുടെ പേരില്‍ തട്ടിപ്പ് നടത്തിയെന്ന പരാതിയില്‍ ഡിജിപി റിപ്പോര്‍ട്ട് കൈമാറി. കേസില്‍ അഴിമതി നിരോധന നിയമപ്രകാരം കേസെടുക്കാമെന്ന് സംസ്ഥാന പോലിസ് മേധാവി ആഭ്യന്തര വകുപ്പിന് നല്‍കിയ റിപ്പോര്‍ട്ടില്‍ വ്യക്തമാക്കി. നിലവിലെ പ്രത്യേക അന്വേഷണ സംഘത്തിന്റെ അന്വേഷണം തുടരണമെന്നും ഡിജിപി ശുപാര്‍ശ ചെയ്തിട്ടുണ്ട്. ഡിജിപിയുടെ റിപ്പോര്‍ട്ട് ആഭ്യന്തര സെക്രട്ടറിക്ക് കൈമാറി.
എസ്‌ഐടി അന്വേഷണം തുടരുന്നതിനൊപ്പം വിജിലന്‍സ് അന്വേഷണം ഉള്‍പ്പെടെയുള്ള തുടര്‍നടപടികളില്‍ സര്‍ക്കാര്‍ ഉടന്‍ തീരുമാനമെടുക്കും. നിയമോപദേശം തേടിയ ശേഷമായിരിക്കും അന്വേഷണത്തിന്റെ തുടര്‍ നടപടികളില്‍ അന്തിമ തീരുമാനം ഉണ്ടാകുക. അന്വേഷണത്തിന്റെ ഭാഗമായി മുന്‍ കായികമന്ത്രി വി അബ്ദുറഹിമാനെയും ചോദ്യം ചെയ്തിരുന്നു. സ്‌പോണ്‍സറെ തിരഞ്ഞെടുത്ത രീതി, മന്ത്രിയുടെ ഓഫിസിന്റെ ഇടപെടല്‍, വിദേശയാത്ര എന്നിവയുമായി ബന്ധപ്പെട്ട കാര്യങ്ങളിലാണ് എസ്‌ഐടി വിവരങ്ങള്‍ തേടിയത്.
സ്‌പോണ്‍സറെ തിരഞ്ഞെടുക്കുന്നതില്‍ ചട്ടലംഘനം നടന്നോ, ഔദ്യോഗിക നടപടിക്രമങ്ങള്‍ പാലിച്ചോ, ഇടപാടുകളില്‍ ക്രമക്കേടുണ്ടായോ തുടങ്ങിയ കാര്യങ്ങളാണ് അന്വേഷണത്തില്‍ പരിശോധിക്കുന്നത്. നേരത്തെ തന്നെ അഴിമതി നിരോധന നിയമപ്രകാരം കേസെടുക്കാമെന്ന നിയമോപദേശം ലഭിച്ചിരുന്നതായി റിപ്പോര്‍ട്ടുകളുണ്ടായിരുന്നു.
SUMMARY: Fraud in Messi’s name; DGP submits report, recommends registering a case
