ബെംഗളൂരു: എസ്ജെകെഎം ബെംഗളൂരു നോർത്ത് റൈഞ്ചിന്റെ ആഭിമുഖ്യത്തിൽ സംഘടിപ്പിക്കുന്ന ഇസ്‌ലാമിക കലാ-സാഹിത്യ മത്സരം ഞായറാഴ്ച ബെംഗളൂരുവിൽ നടക്കും. ആയിരത്തിലധികം വിദ്യാർഥികൾ വിവിധ മത്സരങ്ങളിൽ മാറ്റുരയ്ക്കും.മൈസൂർ റോഡിലുള്ള എംഎംഎ ക്രസന്റ് ഓഡിറ്റോറിയത്തിൽ നാല് വേദികളിലായാണ് മത്സരം നടക്കുന്നത്. റൈഞ്ചിന് കീഴിലുള്ള വിവിധ മദ്റസകളിലെ വിദ്യാർത്ഥികളുടെ ഇസ്‌ലാമിക കലാ-സാഹിത്യ കഴിവുകൾ പരിപോഷിപ്പിക്കുകയും സർഗാത്മകമായ പ്രതിഭകൾക്ക് വേദിയൊരുക്കുകയും ചെയ്യുക എന്ന ലക്ഷ്യത്തോടെയാണ് പരിപാടി സംഘടിപ്പിക്കുന്നത്.
കലാമൽസരങ്ങൾക്കൊപ്പം മുഅല്ലിം വിഭാഗ മത്സരങ്ങളും നടക്കും. വൈകുന്നേരം 7 മണിക്ക് നടക്കുന്ന പൊതു സമ്മേളനത്തിൽ വിവിധ മഹല്ലുകളേയും മദ്രസകളേയും പ്രതിനിധീകരിച്ചുള്ള പ്രമുഖർ പങ്കെടുക്കും. പൊതു സമ്മേളനത്തിൽ ഓവറോൾ കിരീട ജേതാക്കൾക്ക് ട്രോഫികളും സമ്മാനങ്ങളും വിതരണം ചെയ്യും. പരിപാടി വീക്ഷിക്കുന്നതിന് വിപുലമായ സൗകര്യങ്ങൾ ഏർപ്പെടുത്തിയതായി ചെയർമാൻ അബ്ദുൽ ലത്തീഫ് ഹാജിയും ജനറൽ കൺവീനർ ഹംസ ഫൈസിയും അറിയിച്ചു.
SUMMARY: Musabaqa: Bengaluru North Range Islamic Arts and Literary Competition Tomorrow
