രാമനഗരയെ ബെംഗളൂരു സൗത്ത് എന്ന് പുനർനാമകരണം ചെയ്യണം; ആവശ്യവുമായി ഡി.കെ. ശിവകുമാർ

ബെംഗളൂരു: രാമനഗര ജില്ലയെ ബെംഗളൂരു സൗത്ത് എന്ന് പുനർനാമകരണം ചെയ്യണമെന്ന് നിർദേശം മുമ്പോട്ട് വെച്ച് ഉപമുഖ്യമന്ത്രി ഡി.കെ ശിവകുമാർ. ജില്ലയിലെ താമസക്കാരായ ഒരു സംഘത്തോടൊപ്പം ഈ ആവശ്യമുന്നയിച്ച് ചൊവ്വാഴ്ച മുഖ്യമന്ത്രി സിദ്ധരാമയ്യയെ കണ്ട് പുനർനാമകരണം ചെയ്യാൻ ശിവകുമാർ നിവേദനം സമർപ്പിച്ചു.

ഇതോടെ ബെംഗളൂരു സൗത്ത് ജില്ലയിൽ ചന്നപട്ടണ, രാമനഗര, കനകപുര, മഗഡി, ഹരോഹള്ളി എന്നീ അഞ്ച് താലൂക്കുകൾ ഉൾപ്പെടും. രാമനഗര താലൂക്ക് ഈ ജില്ലയുടെ ആസ്ഥാനമായിരിക്കുമെന്നും അദ്ദേഹം വ്യക്തമാക്കി.

രാമനഗര ജില്ല മുഴുവൻ ബെംഗളൂരു പരിധിയിൽ പെട്ടതാണെന്നും അതിലെ നാല് താലൂക്കുകളിലെ നിവാസികൾ ബെംഗളൂരുകാരാണ് എന്നും അദ്ദേഹം കൂട്ടിച്ചേർത്തു. കനകപുര നിയമസഭാ മണ്ഡലത്തെ പ്രതിനിധീകരിക്കുന്ന ശിവകുമാർ, രാമനഗര ജില്ലയെ ബെംഗളൂരുവിനു കീഴിലാക്കാനുള്ള നിർദ്ദേശവും രൂപരേഖയും ഉടൻ അവതരിപ്പിക്കുമെന്നും പറഞ്ഞു.

2007 ഓഗസ്റ്റിൽ എച്ച്.ഡി. കുമാരസ്വാമി ജെഡിഎസ്-ബിജെപി സഖ്യത്തിന്റെ മുഖ്യമന്ത്രിയായിരിക്കുമ്പോഴാണ് രാമനഗര ജില്ല രൂപീകരിക്കുന്നത്. ജില്ലയുടെ പേര് മാറ്റാനുള്ള നിർദ്ദേശവുമായി കർണാടക സർക്കാർ മുന്നോട്ടുപോകാൻ തീരുമാനിച്ചാൽ മരണം വരെ നിരാഹാര സമരം നടത്തുമെന്ന് കുമാരസ്വാമി പറഞ്ഞു.

TAGS: BENGALURU UPDATES | DK SHIVAKUMAR
SUMMARY: DK Shivakumar insists renaming ramnagara as bengaluru south