മഹാ കുംഭമേളയിലെ വ്യാജ സ്‌നാന ചിത്രം; നടൻ പ്രകാശ് രാജ് പോലീസില്‍ പരാതി നല്‍കി

ബെംഗളൂരു: ഉത്തര്‍പ്രദേശിലെ പ്രയാഗ്‌രാജിൽ നടക്കുന്ന മഹാകുംഭമേളയിൽ പങ്കെടുക്കുന്ന തരത്തിലുള്ള തന്‍റെ വ്യാജ ചിത്രം സോഷ്യൽ മീഡിയയിൽ പ്രചരിപ്പിച്ചുവെന്ന് ആരോപിച്ച് പോലീസിൽ പരാതി നൽകി നടൻ പ്രകാശ് രാജ്. ഇന്‍ഫ്ലുവന്‍സറായ പ്രശാന്ത് സംബർഗിയ്‌ക്ക് എതിരെ ലക്ഷ്‌മിപുരം പോലീസിലാണ് നടന്‍ പരാതി നല്‍കിയിരിക്കുന്നത്. എഐ ഉപയോഗിച്ച് നിര്‍മിച്ച ചിത്രം തെറ്റിദ്ധരിപ്പിക്കുന്ന അടിക്കുറിപ്പിനൊപ്പം പ്രചരിപ്പിച്ചത് തന്‍റെ പ്രതിച്ഛായയ്ക്ക് കോട്ടം വരുത്തിയെന്നും നടൻ ആരോപിച്ചു.

പരാതി നൽകുന്നതിന് മുമ്പ് മൈസൂരു സിറ്റി പോലീസ് കമ്മീഷണർ സീമ ലട്‌കറുമായി നേരിട്ട് സംസാരിച്ചിരുന്നുവെന്നും പ്രകാശ് രാജ് പറഞ്ഞു. പ്രകാശ് രാജ് കുംഭമേളയില്‍ സ്‌നാനം ചെയ്യുന്ന തരത്തിലുള്ള ചിത്രമായിരുന്നു സോഷ്യല്‍ മീഡിയയില്‍ പ്രചരിച്ചത്. തന്‍റെ രാഷ്‌ട്രീയ നിലപാടുകളാല്‍ വാർത്തകളിൽ എന്നും ഇടം പിടിച്ചിട്ടുള്ള നടനാണ് പ്രകാശ് രാജ്. ദൈവത്തിൽ താന്‍ വിശ്വസിക്കുന്നില്ലെന്ന് പല അഭിമുഖങ്ങളിലും അദ്ദേഹം വ്യക്തമാക്കിയിട്ടുണ്ട്.

TAGS: KARNATAKA | PRAKASH RAJ
SUMMARY: Actor Prakash Raj lodges complaint on use of fake photo at Kumbh Mela on social media