നമ്മ മെട്രോ മൂന്നാം ഘട്ട പദ്ധതി നിർമാണം നാല് വർഷത്തിനകം പൂർത്തിയാകും

ബെംഗളൂരു: നമ്മ മെട്രോ ശൃംഖലയുടെ മൂന്നാം ഘട്ട നിർമാണം നാല് വർഷങ്ങൾക്കകം പൂർത്തിയാകുമെന്ന് ബിഎംആർസിഎൽ അറിയിച്ചു. മൂന്നാംഘട്ട നിർമ്മാണ പ്രവർത്തനങ്ങൾ ആരംഭിക്കാൻ അടുത്തിടെയാണ് കർണാടക മന്ത്രിസഭ അനുമതി നൽകിയത്. പദ്ധതി പൂർത്തീകരണത്തിന് 2028 വരെയാണ് സമയപരിധി നിശ്ചയിച്ചിട്ടുള്ളത് എന്ന് ബിഎംആർസിഎൽ അധികൃതർ പറഞ്ഞു. 15,611 കോടി രൂപയാണ് പദ്ധതിക്ക് ചെലവ് പ്രതീക്ഷിക്കുന്നത്.

പാത പ്രവർത്തനക്ഷമമാകുന്നതോടെ നഗരത്തിലെ പല പ്രധാന മേഖലകളിലെയും ഗതാഗതക്കുരുക്കിന് പരിഹാരമാകും. ഔട്ടർ റിംഗ് റോഡിന്റെ (ഒആർആർ) പ്രധാന ഭാഗങ്ങളാണ് മൂന്നാംഘട്ട പദ്ധതിയിൽ ഉൾപ്പെടുന്നത്. ഒആർആറിലെ 44.65 കിലോമീറ്റർ പാത പദ്ധതിയുടെ ഭാഗമാണ്. പദ്ധതിയുടെ നിർമാണ പ്രവൃത്തികൾ രണ്ട് ദിവസത്തിനകം ആരംഭിക്കുമെന്ന്

റവന്യൂ മന്ത്രി കൃഷ്ണ ബൈരെ ഗൗഡ അറിയിച്ചു. പദ്ധതിക്ക് കീഴിൽ ഹെബ്ബാളിനും ജെപി നഗറിനും ഇടയിൽ ആദ്യ മെട്രോ ഇടനാഴി നിർമ്മിക്കുമെന്നും അദ്ദേഹം പറഞ്ഞു. 32.15 കിലോമീറ്റർ നീളത്തിലാണ് ഇടനാഴി. ഗോരഗുണ്ടേപാളയ, മാഗഡി റോഡ്, മൈസൂരു റോഡ്, ജെപി നഗർ ഉൾപ്പെടെയുള്ള പ്രദേശങ്ങളെ ബന്ധിപ്പിക്കുന്നതാണ് മറ്റൊരു ലൈൻ. ഇതുകൂടാതെ മൂന്നാമത് ലൈൻ ഹൊസഹള്ളിയെ മാഗഡി റോഡിലേക്കും, കടബഗെരെയിലേക്കും ബന്ധിപ്പിക്കും.

The post നമ്മ മെട്രോ മൂന്നാം ഘട്ട പദ്ധതി നിർമാണം നാല് വർഷത്തിനകം പൂർത്തിയാകും appeared first on News Bengaluru.