ബെംഗളൂരു: രാമനഗര ജില്ലയുടെ പേര് മാറ്റത്തിന് അംഗീകാരം നൽകി കർണാടക മന്ത്രിസഭ. ജില്ലയെ ബെംഗളൂരു സൗത്ത് എന്ന് പുനർനാമകരണം ചെയ്യാനാണ് സർക്കാർ തീരുമാനമെന്ന് നിയമ, പാർലമെൻ്ററികാര്യ മന്ത്രി എച്ച്.കെ. പാട്ടീൽ അറിയിച്ചു. വെള്ളിയാഴ്ച നടന്ന മന്ത്രിസഭാ യോഗമാണ് പേര് മാറ്റത്തിന് അംഗീകാരം നൽകിയത്.
രാമനഗര നിവാസികളുടെയും തെരഞ്ഞെടുക്കപ്പെട്ട പ്രതിനിധികളുടെയും ആവശ്യപ്രകാരമാണ് പേര് മാറ്റത്തിന് അംഗീകാരം നൽകിയതെന്ന് മന്ത്രി എച്ച്.കെ. പാട്ടീൽ അറിയിച്ചു. ബെംഗളൂരു എന്ന ബ്രാൻഡ് മനസ്സിൽ വെച്ച് രാമനഗരയിലെ നിയമസഭാംഗങ്ങൾ സമർപ്പിച്ച നിർദേശം മന്ത്രിസഭ അംഗീകരിച്ചു. മാറ്റം ജില്ലയുടെ പേരിൽ മാത്രമായി പരിമിതപ്പെടുത്തിയിട്ടുണ്ട്. ജില്ലയ്ക്കുള്ളിലെ താലൂക്കുകളെ ബാധിക്കില്ല. ജില്ലയുടെ പേരിനെ മാത്രം ബാധിക്കുന്ന മാറ്റം സംബന്ധിച്ച അറിയിപ്പ് റവന്യു വകുപ്പ് പുറത്തിറക്കുമെന്നും മന്ത്രി എച്ച്.കെ. പാട്ടീൽ പറഞ്ഞു.
രാമനഗര ജില്ലയുടെ പേര് ബെംഗളൂരു സൗത്ത് എന്നാക്കണമെന്ന ആവശ്യം കർണാടക ഉപമുഖ്യമന്ത്രി ഡികെ ശിവകുമാർ കഴിഞ്ഞ വർഷം ഒക്ടോബറിൽ മുന്നോട്ടുവെച്ചിരുന്നു. എന്നാൽ ജില്ലയുടെ പേര് മാറ്റിയാൽ മരണം വരെ നിരാഹാര സമരം നടത്തുമെന്ന് കേന്ദ്രമന്ത്രി എച്ച്.ഡി. കുമാരസ്വാമി നേരത്തെ പറഞ്ഞിരുന്നു.
TAGS: BENGALURU | RAMANAGARA
SUMMARY: Cabinet nod for change of ramanagara name to bengaluru south
