ബെംഗളൂരു: സംസ്ഥാനത്ത് പാൽ വില വർധനയ്ക്ക് പിന്നാലെ ബസ് യാത്രാ നിരക്കും വർധിപ്പിപ്പിക്കുന്നു. പുതുക്കിയ നിരക്ക് നവംബർ 5 മുതൽ മുതൽ പുതുക്കിയനിരക്ക് പ്രാബല്യത്തിൽവരും. ഇത് സംബന്ധിച്ചുള്ള അന്തിമ നിരക്ക് നവംബർ 4-ന് തീരുമാനിക്കുമെന്ന് ഗതാഗതമന്ത്രി ബൈരതി സുരേഷ് അറിയിച്ചു. ബി.എം.ടി.സി ഉൾപ്പെടെ സംസ്ഥാനത്തെ നാല് പൊതു ഗതാഗത കോർപ്പറേഷനുകളിലും നിരക്ക് വർധന നടപ്പാക്കാനാണ് സർക്കാർ ആലോചിക്കുന്നത്.
നാല് ഗതാഗത കോർപ്പറേഷനുകളും നേരിടുന്ന സാമ്പത്തിക നഷ്ടവും പ്രവർത്തനച്ചെലവിലെ വർധനയുമാണ് നിരക്ക് കൂട്ടാനുള്ള പ്രധാന കാരണങ്ങളായി ചൂണ്ടിക്കാണിക്കുന്നത്. നിരക്ക് വർധന സംബന്ധിച്ച് പഠനം നടത്തിയ സമിതി, ബി.എം.ടി.സി ബസ് നിരക്കിൽ 45 ശതമാനവും മറ്റു മൂന്ന് ഗതാഗത കോർപ്പറേഷനുകളിൽ 28 ശതമാനവും വർധന വരുത്താൻ ശുപാർശ ചെയ്തിട്ടുണ്ട്.
എന്നാൽ സമിതിയുടെ ശുപാർശ അതേപടി നടപ്പാക്കുമോ എന്ന കാര്യത്തിൽ അന്തിമ തീരുമാനമായിട്ടില്ല. നവംബർ 4-ന് നടക്കുന്ന തീരുമാനത്തിന് ശേഷമേ വിവിധ ദൂരങ്ങളിലേക്കുള്ള പുതിയ നിരക്കുകൾ വ്യക്തമാകൂ.
നിരക്ക് വർധന പ്രാബല്യത്തിൽ വരുന്നതോടെ ദിവസേന ബസുകളെ ആശ്രയിച്ച് യാത്ര ചെയ്യുന്ന വിദ്യാർഥികൾ, ജീവനക്കാർ, സാധാരണ യാത്രക്കാർ എന്നിവരുടെ യാത്രാച്ചെലവിൽ വർധനയുണ്ടാകും. പ്രത്യേകിച്ച് നഗരത്തിനുള്ളിൽ ദിവസേന യാത്ര ചെയ്യുന്നവരെ സംബന്ധിച്ചിടത്തോളം ബി.എം.ടി.സി നിരക്കിലെ മാറ്റം പ്രധാനമാണ്.
SUMMARY: Bus fare hike in Karnataka from November 5
