ന്യൂഡല്‍ഹി: മുഖ്യ തിരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്റെ രാജി ആവശ്യത്തില്‍ രാജ്യ തലസ്ഥാനം ഇന്നും പ്രക്ഷുബ്ധമാകും. പ്രതിപക്ഷ എംപിമാര്‍ ഇന്ന് തെരഞ്ഞെടുപ്പ് കമ്മീഷന്‍ ആസ്ഥാനത്തേക്ക് മാര്‍ച്ച് നടത്തും. ആം ആദ്മി പാര്‍ട്ടിയെയും ഡിഎംകെയെയും ബിജെഡിയെയും മാര്‍ച്ചിലേക്ക് ക്ഷണിച്ചിട്ടുണ്ട്. ഇന്ന് വിവിധ വിദ്യാര്‍ഥി യുവജന സംഘടനകളും ഡല്‍ഹിയില്‍ പ്രതിഷേധം സംഘടിപ്പിക്കും.
ഗ്യാനേഷ് കുമാറിന്റെ രാജിയാവശ്യപ്പെട്ട് എൻഎസ്‌യുഐ ഇന്നലെ ജന്തർ മന്തറിലേക്ക് പ്രതിഷേധ മാർച്ച് നടത്തിയിരുന്നു. പ്രതീകാത്മകമായി മൃതദേഹങ്ങളായി കിടന്ന് പ്രതിഷേധിച്ച പ്രവർത്തകരെ പൊലീസ് ബലപ്രയോഗത്തിലൂടെ അറസ്റ്റ് ചെയ്ത് നീക്കി. ജനാധിപത്യപരമായി പ്രതിഷേധിക്കുന്നതിനിടെയാണ് പൊലീസ് നടപടിയുണ്ടായതെന്ന് എൻഎസ്‌യുഐ പ്രവർത്തകർ ആരോപിച്ചു.
വിഷയം ദേശീയതലത്തിൽ ശക്തമായ പ്രതിഷേധമായി ഉയർത്താനാണ് കോൺഗ്രസ് തീരുമാനം. ശനിയാഴ്ച മുതൽ ‘വോട്ട് ബച്ചാവോ, ദേശ് ബച്ചാവോ’ ക്യാമ്പയിന് തുടക്കമിടും. നവംബർ ഒന്നിന് ഡൽഹിയിലെ രാംലീല മൈതാനത്ത് മഹാറാലിയും സംഘടിപ്പിക്കും. തിരഞ്ഞെടുപ്പ് കമ്മിഷന്റെ നടപടികൾക്കെതിരായ പ്രതിഷേധം രാജ്യവ്യാപകമായി വ്യാപിപ്പിക്കുകയാണ് കോൺഗ്രസിന്റെ ലക്ഷ്യം.
അതേസമയം, ഗ്യാനേഷ് കുമാറിനെതിരായ കേരളത്തിലെ വിജിലൻസ് കേസുകളുടെ തുടർ അന്വേഷണം കോൺഗ്രസ് ഹൈക്കമാൻഡിന്റെ നിർദേശപ്രകാരമാണെന്ന് കെ.സി. വേണുഗോപാൽ എംപി വ്യക്തമാക്കി. തിരഞ്ഞെടുപ്പ് കമ്മിഷനെതിരായ പ്രതിഷേധത്തിന്റെ ഭാഗമായി കേരളത്തിലും വിഷയത്തിൽ തുടർനടപടികൾ ഉണ്ടാകുമെന്ന സൂചനയാണ് ഇതോടെ പുറത്തുവരുന്നത്.
SUMMARY: Demand for Gyanesh Kumar’s resignation; Opposition march to Election Commission headquarters.
