അബുദാബി: യു എ ഇയിലെ അബുദാബി അല് ദഫ്ര മേഖലയില് പ്രവർത്തിക്കുന്ന ബറക ആണവോർജ്ജ നിലയത്തിന് നേരെ ഡ്രോണ് ആക്രമണം. ആക്രമണത്തെ തുടർന്ന് ആണവനിലയത്തിന്റെ ഉള്പ്രദേശത്തിന് പുറത്തുള്ള ഇലക്ട്രിക്കല് ജനറേറ്ററില് വൻ തീപിടിത്തമുണ്ടായി. അബുദാബിയിലെ സിവില് ഡിഫൻസ് അടക്കമുള്ള സുരക്ഷാ സേനകള് ഉടനടി സ്ഥലത്തെത്തി തീപിടിത്തം പൂർണ്ണമായും നിയന്ത്രണവിധേയമാക്കി.
ആക്രമണത്തില് ആർക്കും പരുക്കേറ്റിട്ടില്ലെന്നും ആണവനിലയത്തിന്റെ സുരക്ഷിതത്വത്തെയോ റേഡിയേഷൻ അളവിനെയോ ബാധിക്കുന്ന തരത്തിലുള്ള യാതൊരുവിധ റേഡിയോ ആക്ടീവ് ചോർച്ചയും റിപ്പോർട്ട് ചെയ്തിട്ടില്ലെന്നും അബുദാബി മീഡിയ ഓഫീസ് ഔദ്യോഗിക എക്സ് അക്കൗണ്ടിലൂടെ വ്യക്തമാക്കിയിട്ടുണ്ട്. ആണവനിലയത്തിന്റെ പ്രധാന സുരക്ഷാ വേലികള്ക്ക് പുറത്തുള്ള ഭാഗത്താണ് സംഭവം നടന്നത്.
യു എ ഇയിലെ ആണവ രംഗത്തെ നിയന്ത്രണ ബോർഡായ ഫെഡറല് അതോറിറ്റി ഫോർ ന്യൂക്ലിയർ റെഗുലേഷൻ (എഫ് എ എൻ ആർ) സംഭവത്തില് വിശദീകരണം നല്കിയിട്ടുണ്ട്. തീപിടിത്തം ആണവനിലയത്തിന്റെ സുരക്ഷയെയോ അതിന്റെ പ്രധാന സംവിധാനങ്ങളുടെ പ്രവർത്തന സജ്ജതയെയോ യാതൊരു വിധത്തിലും ബാധിച്ചിട്ടില്ലെന്നും നിലയത്തിലെ എല്ലാ യൂണിറ്റുകളും സാധാരണ നിലയില് തന്നെയാണ് പ്രവർത്തിക്കുന്നതെന്നും അധികൃതർ സ്ഥിരീകരിച്ചു.
മേഖലയില് ആവശ്യമായ എല്ലാ മുൻകരുതല് നടപടികളും അധികൃതർ സ്വീകരിച്ചിട്ടുണ്ട്. ഈ സംഭവവുമായി ബന്ധപ്പെട്ട് കൂടുതല് വിവരങ്ങള് ലഭ്യമാകുന്ന മുറയ്ക്ക് ഔദ്യോഗികമായി പുറത്തുവിടുമെന്ന് അധികൃതർ അറിയിച്ചു. സമൂഹമാധ്യമങ്ങളിലൂടെയും മറ്റും വ്യാജ വാർത്തകളും അഭ്യൂഹങ്ങളും പ്രചരിപ്പിക്കരുതെന്നും പൊതുജനങ്ങള് ഔദ്യോഗിക സ്രോതസ്സുകളില് നിന്നുള്ള വിവരങ്ങള് മാത്രം വിശ്വസിക്കണമെന്നും അബുദാബി മീഡിയ ഓഫീസ് കർശന നിർദേശം നല്കിയിട്ടുണ്ട്.
SUMMARY: Drone attack near Baraka nuclear power plant in Abu Dhabi
