ബെംഗളൂരു: നഗരത്തിലെ ഗതാഗതക്കുരുക്ക് കുറയ്ക്കുന്നതിനുള്ള പ്രധാന പദ്ധതിയായി യശ്വന്ത്പുര മത്തിക്കരെ ക്രോസിൽ നിന്ന് കെ.ആർ. പുരയിലെ ടിൻ ഫാക്ടറി ജംഗ്ഷൻ വരെ ഏകദേശം 28 കിലോമീറ്റർ നീളമുള്ള എലിവേറ്റഡ് കോറിഡോർ വരുന്നു. പദ്ധതിയുടെ നിർമാണത്തിനായി ബെംഗളൂരു സ്മാർട്ട് ഇൻഫ്രാസ്ട്രക്ചർ ലിമിറ്റഡ് ടെൻഡർ ക്ഷണിച്ചു.
നഗരത്തിലെ ആദ്യത്തെ ടോൾ ഫ്രീ എലിവേറ്റഡ് കോറിഡോറും ഏറ്റവും നീളമേറിയ മേൽപ്പാതകളിലൊന്നുമായിരിക്കും ഇത്. നിലവിലുള്ള റോഡിലെ വാഹനത്തിരക്ക് കുറയ്ക്കുകയും യാത്രാസമയം ചുരുക്കുകയുമാണ് പദ്ധതിയുടെ പ്രധാന ലക്ഷ്യം.
യശ്വന്ത്പുര–മത്തിക്കരെ ക്രോസ്, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ്, മേക്രി സർക്കിൾ, ജയമഹൽ റോഡ്, സെന്റ് ജോൺസ് ചർച്ച് റോഡ്, ഹലസൂരു തടാകം തുടങ്ങിയ പ്രധാന പ്രദേശങ്ങളിലൂടെയാണ് നിർദിഷ്ട എലിവേറ്റഡ് കോറിഡോർ കടന്നുപോകുക. ഈ മേഖലയില് ദിവസേന അനുഭവപ്പെടുന്ന വലിയ ഗതാഗതക്കുരുക്കിന് പദ്ധതി വലിയ ആശ്വാസമാകുമെന്നാണ് അധികൃതരുടെ പ്രതീക്ഷ.
നിലവിലുള്ള റോഡിന് മുകളിലൂടെ പ്രത്യേക ഗതാഗത ഇടനാഴി ഒരുക്കുന്നതിലൂടെ താഴെയുള്ള റോഡിലെ വാഹനത്തിരക്ക് കുറയ്ക്കാനും യാത്ര സുഗമമാക്കാനും സാധിക്കുമെന്നാണ് വിലയിരുത്തൽ.
പദ്ധതിയുടെ നിർമാണത്തിനായുള്ള ടെൻഡർ നടപടികൾ പൂർത്തിയാക്കിയ ശേഷമായിരിക്കും നിർമാണം ആരംഭിക്കുക. ടോൾ ഫ്രീ ആയിരിക്കും എന്നതാണ് പദ്ധതിയുടെ പ്രധാന പ്രത്യേകത.
SUMMARY: Big Relief from traffic congestion:A 28 km elevated corridor is planned from Yeshwanthpur to KR Puram to ease congestion
