ന്യൂഡൽഹി: ജമ്മു കശ്മീരിൽ ഭീകരനെ വധിച്ച് കരസേന. ലഷ്കർ-ഇ-തൊയ്ബയുടെ ഉന്നത കമാൻഡറായ ഫൗസി മൂസയാണ് കൊല്ലപ്പെട്ടത്. കശ്മീരിലെ ബഡ്ഗാം ജില്ലയിലാണ് സംഭവം. പ്രദേശം വളഞ്ഞുള്ള തെരച്ചിൽ തുടരുന്നതിനിടെ, ദൂധ്പത്രിയിലെ വനമേഖലയിൽ വെച്ചാണ് മൂസ കൊല്ലപ്പെട്ടതെന്ന് ഉദ്യോഗസ്ഥർ വ്യക്തമാക്കി. ഇന്റലിജൻസ് വിവരത്തെ തുടർന്നു നടത്തിയ സംയുക്ത ഓപ്പറേഷനിടെയാണ് ഏറ്റുമുട്ടലുണ്ടായത്. കരസേനയും ജമ്മു കശ്മീർ പോലിസും സിആർപിഎഫും ചേർന്നാണ് ഓപ്പറേഷൻ നടത്തിയത്.
സെപ്റ്റംബർ 5-ന് യൂസ്മാർഗ് മലനിരകളിൽ നടന്ന മറ്റൊരു ഏറ്റുമുട്ടലിൽ നിന്നും ഇയാൾ രക്ഷപ്പെട്ടിരുന്നു. ആ സംഭവത്തിൽ ഫൗസി മൂസയുടെ അടുത്ത സഹായിയായ യാസിർ കൊല്ലപ്പെട്ടിരുന്നു.
ജമ്മു കശ്മീരിൽ നടന്ന നിരവധി ആക്രമണങ്ങളിൽ ഇയാൾക്ക് പങ്കുണ്ടായിരുന്നു. കഴിഞ്ഞ കുറേ വർഷങ്ങളായി പീർ പഞ്ജാൽ മലനിരകളുടെ ഇരുവശങ്ങളിലുമായി നടന്ന നിരവധി ഭീകരാക്രമണങ്ങളിൽ പങ്കാളിയായ മൂസയ്ക്കായി സുരക്ഷാസേന തിരച്ചിൽ നടത്തിവരികയായിരുന്നു. അതേസമയം മേഖലയിൽ കൂടുതൽ ഭീകരർ ഉണ്ടോയെന്ന് കണ്ടെത്താനായി തെരച്ചിൽ തുടരുകയാണ്.
SUMMARY: Encounter in Kashmir: Security forces kill Lashkar-e-Taiba terrorist.
