ബെംഗളൂരു: ബെളഗാവിയിലെ സ്കൂൾ ഹോസ്റ്റലിൽ ഭക്ഷ്യ വിഷ ബാധയുണ്ടായതിനെ തുടർന്ന് 12 വിദ്യാർഥികളെ ആശുപത്രിയിൽ പ്രവേശിപ്പിച്ചു. ചിക്കോടി താലൂക്കിലെ ഹിരെകൊടി മൊറാർജി ദേശായി റെസിഡൻഷ്യൽ സ്കൂളിലെ കുട്ടികൾക്കാണ് ഭക്ഷ്യ വിഷബാധയേറ്റത്. ഞായാറാഴ്ച രാത്രി അത്താഴം കഴിച്ചതിനുശേഷം കുട്ടികൾക്ക് വയറുവേദനയും ഛർദിയും അനുഭവപ്പെടുകയായിരുന്നു. ഉടൻ സ്കൂൾ അധികൃതർ കുട്ടകളെ ആശുപത്രിയിലേക്ക് മാറ്റി. കുട്ടികളുടെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു.
സെപ്റ്റംബറിൽ ഇതേ സ്കൂൾ ഹോസ്റ്റലിൽ ഭക്ഷ്യവിഷ ബാധയുണ്ടായതിനെ തുടർന്ന് 60 വിദ്യാർഥികളെ ആശുപത്രിയിൽ പ്രവേശിപ്പിച്ചിരുന്നു. പൊതുവിദ്യാഭ്യാസ വകുപ്പ് ഡപ്യൂട്ടി ഡയറക്ടറും തഹസിൽദാറും ഇതിന്മേൽ അന്വേഷണം നടത്തി വൃത്തിഹീനമായ അവസ്ഥയെക്കുറിച്ച് റിപ്പോർട്ട് സമർപ്പിച്ചിരുന്നു. അടുത്തിടെ പ്രദേശത്തെ ഒരു കോടതിയിലെ ജഡ്ജി സ്കൂളിലെത്തി പരിശോധന നടത്തുകയും ഹോസ്റ്റൽ വാർഡനെയും ജീവനക്കാരെയും താക്കീത് നൽകുകയും ചെയ്തിരുന്നു.
SUMMARY: Food poisoning again at school hostel in Belagavi. 12 children hospitalized
