നമ്മ മെട്രോ പിങ്ക് ലൈന്‍; ആദ്യഘട്ട ട്രെയിൻ സർവീസ് അടുത്ത വര്‍ഷം മേയിൽ

ബെംഗളൂരു: നമ്മ മെട്രോ കല്ലേന അഗ്രഹാര-നാഗവാര പിങ്ക് ലൈനിൻ്റെ ആദ്യഘട്ടത്തിലെ ട്രെയിൻ സർവീസ് അടുത്ത വര്‍ഷം മേയിൽ ആരംഭിക്കും. ബെംഗളൂരു വികസന വകുപ്പിന്റെ ചുമതല കൂടി ഉള്ള ഉപമുഖ്യമന്ത്രി ഡി.കെ.ശിവകുമാർ ആണ് ഇക്കാര്യം അറിയിച്ചത്. 21.76 കിലോമീറ്റർ പാതയിൽ കല്ലേന അഗ്രഹാര മുതൽ താവരക്കരെ വരെയുള്ള 13.7 കിലോമീറ്റർ എലിവേറ്റഡ് പാതയാണ് ആദ്യം തുറക്കുക. കല്ലേന അഗ്രഹാര, ഹുളിമാവ്, ഐഐഎം ബെംഗളൂരു, ജെപി നഗർ ഫോർത്ത് ഫേസ്, ജയദേവ, താവരക്കരെ എന്നി 6 സ്റ്റേഷനുകളാണു ആദ്യഘട്ട പാതയിലുള്ളത്.

എംജി റോഡ്, ശിവാജിനഗർ, ടാനറി റോഡ് തുടങ്ങിയ പ്രധാന കേന്ദ്രങ്ങളിലൂടെ കടന്നുപോകുന്ന ഡയറി സർക്കിള്‍- നാഗവാര 13.76 കിലോമീറ്റർ ഭൂഗർഭ പാത അടുത്ത വർഷം ഡിസംബറോടെ തുറന്നു നൽകാനാണു ലക്ഷ്യമിടുന്നത്. ഇരു പാതകളും പൂര്‍ണമായി പ്രവർത്തനക്ഷമമായിക്കഴിഞ്ഞാൽ എംജി റോഡ്, ശിവാജിനഗർ, കന്റോൺമെന്റ് എന്നിവയുൾപ്പെടെ നിരവധി പ്രധാന യാത്ര കേന്ദ്രങ്ങളെ ബന്ധിപ്പിക്കുന്നതിന് സഹായകരമാകും. നഗരത്തിലെ വടക്ക്-തെക്ക് ഭാഗങ്ങളിലെ കണക്റ്റിവിറ്റിയെ മെച്ചപ്പെടുത്തുന്നതിനും, ജനസാന്ദ്രമായ റെസിഡൻഷ്യൽ ഏരിയകളെയും പ്രധാന വാണിജ്യ മേഖലകളെയും ബന്ധിപ്പിക്കുന്നതിനും പാത സഹായിക്കും.
SUMMARY: Namma Metro Pink Line; First phase of train service to start in May next year