കൊച്ചി: ഹൈറിച്ച് സാമ്പത്തിക തട്ടിപ്പ് കേസില് കമ്പനി ഉടമയും ഡയറക്ടറുമായ കെ.ഡി. പ്രതാപന് തിരിച്ചടി. പ്രതാപന് നേരത്തെ അനുവദിച്ച ജാമ്യം എറണാകുളം പി.എം.എല്.എ കോടതി റദ്ദാക്കി. തിങ്കളാഴ്ച കോടതിയില് കീഴടങ്ങണമെന്നും നിർദേശിച്ചിട്ടുണ്ട്. ജാമ്യം റദ്ദാക്കണമെന്നാവശ്യപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇ.ഡി.) സമർപ്പിച്ച ഹർജിയിലാണ് കോടതിയുടെ നടപടി.
19 മാസം ജയിലില് കഴിഞ്ഞതിന് പിന്നാലെയാണ് പ്രതാപന് നേരത്തെ കോടതി ജാമ്യം അനുവദിച്ചത്. കേസില് വിചാരണ ആരംഭിച്ചിട്ടില്ലെന്നതടക്കമുള്ള സാഹചര്യങ്ങള് പരിഗണിച്ചായിരുന്നു അന്നത്തെ തീരുമാനം. എന്നാല് ജാമ്യം അനുവദിച്ച ഉത്തരവിനെതിരെ ഇ.ഡി. ഹൈക്കോടതിയെ സമീപിച്ചു. തുടർന്ന് ഹൈക്കോടതിയുടെ നിർദേശപ്രകാരം എറണാകുളം പി.എം.എല്.എ കോടതി ജാമ്യ ഉത്തരവ് പുനഃപരിശോധിക്കുകയായിരുന്നു.
ഇതിന് പിന്നാലെയാണ് പ്രതാപന്റെ ജാമ്യം റദ്ദാക്കാനും കോടതിയില് കീഴടങ്ങാൻ നിർദേശിക്കാനും തീരുമാനിച്ചത്. 2024 ജൂലൈയിലാണ് ഹൈറിച്ച് കമ്പനി വഴി 3,141 കോടി രൂപയുടെ സാമ്പത്തിക തട്ടിപ്പ് നടന്നെന്ന വിവരം പുറത്തുവന്നത്. പിന്നാലെ കമ്പനി ഉടമ കെ.ഡി. പ്രതാപനെ ഇ.ഡി. അറസ്റ്റ് ചെയ്തു. തുടർന്ന് നടത്തിയ അന്വേഷണത്തില് 1,651 കോടി രൂപയുടെ കള്ളപ്പണ ഇടപാടുകള് കണ്ടെത്തിയതായി ഇ.ഡി. കോടതിയില് അറിയിച്ചു. ഇതുമായി ബന്ധപ്പെട്ട് അന്വേഷണ ഏജൻസി ആദ്യഘട്ട കുറ്റപത്രവും സമർപ്പിച്ചിരുന്നു.
SUMMARY: Highrich financial fraud case: K.D. Prathapan’s bail cancelled















