പാലക്കാട്: വിവാഹവാഗ്ദാനം നല്‍കി മുംബൈ സ്വദേശിനിയില്‍ നിന്ന് 43 ലക്ഷം രൂപയും അഞ്ച് പവൻ സ്വർണാഭരണങ്ങളും തട്ടിയെടുത്തെന്ന പരാതിയില്‍ പട്ടാമ്പി സ്വദേശി അറസ്റ്റില്‍. മേലേ പട്ടാമ്പി ആലിക്കല്‍ മുഹമ്മദ് അമീറിനെയാണ് (45) ഷൊർണൂർ പോലീസ് അറസ്റ്റ് ചെയ്തത്. മുംബൈയിലെ സ്വകാര്യ കമ്പനിയില്‍ ജോലി ചെയ്യുന്ന യുവതി വെള്ളിയാഴ്ച രാവിലെ ഷൊർണൂർ പോലീസ് സ്റ്റേഷനിലെത്തിയാണ് പരാതി നല്‍കിയത്.
2019 മുതല്‍ 2026 വരെയുള്ള കാലയളവില്‍ 33കാരിയായ യുവതിയെ വിവാഹം കഴിക്കാമെന്ന് വാഗ്ദാനം ചെയ്ത് കേരളത്തിലെത്തിച്ച്‌ ആലപ്പുഴയിലും ഷൊര്‍ണൂരിലുമുള്‍പ്പെടെ വിവിധ സ്ഥലങ്ങളില്‍ വെച്ച്‌ പലതവണ ലൈംഗികമായി പീഡിപ്പിച്ചെന്നാണ് യുവതി നല്‍കിയ പരാതിയില്‍ പറയുന്നത്. സുഹൃത്ത് വഴിയാണ് മുഹമ്മദ് അമീറിനെ യുവതി പരിചയപ്പെട്ടത്. പിന്നീട് സാമൂഹികമാധ്യമത്തിലൂടെ വീണ്ടും ബന്ധം സ്ഥാപിച്ച അമീർ വിവാഹവാഗ്ദാനം നല്‍കിയെന്നും തുടർന്ന് ലൈംഗികമായി ഉപയോഗിച്ചെന്നുമാണ് പരാതിയിലെ ആരോപണം.
വിവാഹ വാഗ്ദാനം നല്‍കി യുവതിയെ കേരളത്തിലേക്ക് എത്തിക്കുകയായിരുന്നു. എന്നാല്‍ അമീര്‍ നേരത്തെ വിവാഹിതനും രണ്ട് കുട്ടികളുടെ പിതാവുമാണെന്ന വിവരം മറച്ചുവെച്ചാണ് യുവതിയുമായി ബന്ധം സ്ഥാപിച്ചതെന്നും പരാതിയില്‍ ആരോപിക്കുന്നു. ഷൊര്‍ണൂര്‍ ഐക്കോണ്‍ ആശുപത്രിക്ക് സമീപത്തെ സ്ഥലത്താണ് യുവതിയെ താമസിപ്പിച്ചിരുന്നതെന്നും പരാതിയില്‍ പറയുന്നു. ബിസിനസ് ആവശ്യങ്ങള്‍ക്കെന്ന് പറഞ്ഞ് 43 ലക്ഷം രൂപയും നാല് സ്വര്‍ണവളകളും രണ്ട് മോതിരങ്ങളും കമ്മലുകളും അമീര്‍ കൈക്കലാക്കിയെന്നാണ് യുവതിയുടെ ആരോപണം.
പിന്നീട് അമീറിനെ ഫോണില്‍ ബന്ധപ്പെടാന്‍ ശ്രമിച്ചെങ്കിലും പ്രതികരണമുണ്ടായില്ല. തുടര്‍ന്ന് നടത്തിയ അന്വേഷണത്തിലാണ് പട്ടാമ്പിയിലെ വിലാസം യുവതിക്ക് ലഭിച്ചത്. അവിടെ എത്തിയപ്പോഴാണ് അമീറിന് കുടുംബമുണ്ടെന്ന വിവരം അറിയുന്നതെന്നും പരാതിയില്‍ പറയുന്നു. യുവതി നേരിട്ട് ഷൊര്‍ണൂര്‍ പോലീസ് സ്റ്റേഷനിലെത്തി നല്‍കിയ പരാതിയുടെ അടിസ്ഥാനത്തിലാണ് പോലീസ് കേസെടുത്ത് മുഹമ്മദ് അമീറിനെ അറസ്റ്റ് ചെയ്തത്. പട്ടാമ്പിയില്‍ നേരത്തെ ഹോട്ടലുകള്‍ ഉള്‍പ്പെടെയുള്ള വിവിധ വ്യാപാര സ്ഥാപനങ്ങള്‍ അമീറിന് ഉണ്ടായിരുന്നതായി പോലീസ് അറിയിച്ചു. സംഭവത്തില്‍ പോലീസ് അന്വേഷണം തുടരുകയാണ്.
SUMMARY: Man from Pattambi arrested for swindling 43 lakh and 5 sovereigns of gold from a Mumbai woman under the pretext of marriage
