ബെംഗളൂരു: വരൾച്ചയും ജലക്ഷാമവും രൂക്ഷമാകുന്ന സാഹചര്യത്തിൽ കർണാടകയിലെ ഏഴ് ജില്ലകളിലായി 500 തടാകങ്ങൾ പുനരുജ്ജീവിപ്പിക്കാൻ 150 കോടിയുടെ പദ്ധതി. ലോകബാങ്കിന്റെ സഹായത്തോടെ നടപ്പാക്കുന്ന പദ്ധതിയുടെ സമഗ്ര പദ്ധതി റിപ്പോർട്ട് തയ്യാറാക്കിയതായി ഗ്രാമവികസന–പഞ്ചായത്ത് രാജ് മന്ത്രി ഈശ്വർ കാന്ദ്രേ അറിയിച്ചു.
തടാക വികസന പ്രവർത്തനങ്ങൾ വേഗത്തിലാക്കാൻ ജില്ലാ പഞ്ചായത്ത് അധികൃതർക്ക് മന്ത്രി നിർദേശം നൽകി.
പദ്ധതിയുടെ ഭാഗമായി തടാകങ്ങളിലെ ചെളിയും മണ്ണും നീക്കം ചെയ്യുക, കരകൾ ശക്തിപ്പെടുത്തുകയും ഉയർത്തുകയും ചെയ്യുക, കനാലുകളും നീർച്ചാലുകളും പുനരുദ്ധരിക്കുക, ആവശ്യമായ സൗന്ദര്യവൽക്കരണ പ്രവർത്തനങ്ങൾ നടത്തുക തുടങ്ങിയവയാണ് ലക്ഷ്യമിടുന്നത്.
നിലവിൽ നിരവധി തടാകങ്ങൾ മഴക്കുറവ് മൂലം വരണ്ടുകിടക്കുന്നതിനാൽ ഈ സമയത്തെ പരമാവധി പ്രയോജനപ്പെടുത്തി പുനരുദ്ധാരണ പ്രവർത്തനങ്ങൾ പൂർത്തിയാക്കാനാണ് സർക്കാർ നിർദേശം.
ഏഴ് ജില്ലകളിലായാണ് 500 തടാകങ്ങൾ പദ്ധതിയിൽ ഉൾപ്പെടുത്തിയിരിക്കുന്നത്.
ബെംഗളൂരു റൂറലിൽ 68, ബെംഗളൂരു അർബനിൽ 67, ബീദറിൽ 44, ചിക്കബള്ളാപ്പൂരിൽ 90, കലബുറഗിയിൽ 49, തുമകൂരുവിൽ 96, കോലാറിൽ 86 തടാകങ്ങളാണ് പുനരുജ്ജീവിപ്പിക്കുക. ഇതോടെ ബെംഗളൂരു അർബൻ–റൂറൽ ജില്ലകളിലായി മാത്രം 135 തടാകങ്ങൾ പദ്ധതിയുടെ ഭാഗമാകും.
പുനരുദ്ധരിച്ച തടാകങ്ങളിൽ വരാനിരിക്കുന്ന മഴക്കാലത്ത് കൂടുതൽ വെള്ളം സംഭരിക്കാൻ കഴിയുമെന്നാണ് സർക്കാരിന്റെ പ്രതീക്ഷ. ഇതിലൂടെ അടുത്ത വേനൽക്കാലത്തെ കുടിവെള്ള ക്ഷാമം കുറയ്ക്കുന്നതിനൊപ്പം മണ്ണിലെ ഈർപ്പം വർധിപ്പിക്കാനും ഭൂഗർഭജലനിരപ്പ് മെച്ചപ്പെടുത്താനും സാധിക്കുമെന്ന് മന്ത്രി വ്യക്തമാക്കി.
തടാകങ്ങളുടെയും കനാലുകളുടെയും പുനരുദ്ധാരണ പ്രവർത്തനങ്ങൾ ലോകബാങ്കിന്റെ സഹായത്തോടൊപ്പം ഗ്രാമീണ തൊഴിലുറപ്പ് പദ്ധതിയുമായി സഹകരിച്ചാണ് നടപ്പാക്കുന്നത്. ജലസംരക്ഷണ പ്രവർത്തനങ്ങൾക്കൊപ്പം ഗ്രാമീണ മേഖലയിൽ തൊഴിൽ അവസരങ്ങൾ സൃഷ്ടിക്കുന്നതിനും പദ്ധതി സഹായിക്കുമെന്നാണ് സർക്കാർ വ്യക്തമാക്കുന്നത്.
