കോഴഞ്ചേരി: മത്സ്യവ്യാപാരിയിൽ നിന്ന് കൈക്കൂലി വാങ്ങുന്നതിനിടെ മിമിക്രി കലാകാരൻ കൂടിയായ അയിരൂർ പഞ്ചായത്ത് ഹെഡ് ക്ലർക്ക് വിജിലൻസ് പിടിയിലായി. പത്തനംതിട്ട കുലശേഖരപതി സ്വദേശി താജുദ്ദീൻ (50) ആണ് അറസ്റ്റിലായത്. ഇയാളുടെ പക്കൽ നിന്ന് കൈക്കൂലിയായി വാങ്ങിയ 5000 രൂപ വിജിലൻസ് സംഘം കണ്ടെടുത്തു. സ്റ്റേജ് ഷോകളിൽ സജീവ സാന്നിധ്യമായിരുന്ന ഉദ്യോഗസ്ഥനാണ് ഇപ്പോൾ അറസ്റ്റിലായിരിക്കുന്നത്.
വെൺമണി സ്വദേശിയായ മത്സ്യവ്യാപാരി നൽകിയ പരാതിയിലാണ് വിജിലൻസ് നടപടി. അയിരൂർ പഞ്ചായത്തിലെ തടിയൂരിൽ മറ്റൊരാൾ നടത്തിയിരുന്ന മത്സ്യവ്യാപാര സ്ഥാപനം പരാതിക്കാരൻ ഏറ്റെടുത്തിരുന്നു. പഴയ ഉടമയുടെ പേരിലുള്ള ലൈസൻസ് സ്വന്തം പേരിലേക്ക് മാറ്റുന്നതിനായി പഞ്ചായത്തിൽ അപേക്ഷയും നൽകി. എന്നാൽ സാങ്കേതിക കാരണങ്ങൾ ചൂണ്ടിക്കാട്ടി ലൈസൻസ് പുതുക്കി നൽകാതെ വൈകിപ്പിക്കുകയായിരുന്നു.
ഒക്ടോബർ മാസം ആദ്യം പഞ്ചായത്തിലെ രണ്ട് ഉദ്യോഗസ്ഥർ മത്സ്യവ്യാപാര സ്ഥാപനത്തിലെത്തി ലൈസൻസ് ആവശ്യപ്പെട്ടു. ലൈസൻസ് മാറ്റുന്നതിനായി അപേക്ഷ നൽകിയിട്ടും ലഭിച്ചിട്ടില്ലെന്ന് വ്യാപാരി അറിയിച്ചതോടെ ഓഫീസിലെത്താൻ ഉദ്യോഗസ്ഥർ നിർദേശിച്ചു. തുടർന്ന് ഓഫീസിലെത്തിയ വ്യാപാരിയോട് താജുദ്ദീൻ 20,000 രൂപ പിഴ അടയ്‌ക്കണമെന്ന് ആവശ്യപ്പെട്ടു. 8,000 രൂപ നൽകിയാൽ പിഴയിൽ നിന്ന് ഒഴിവാക്കാമെന്നും പിന്നീട് തുക 5,000 രൂപയായി കുറയ്‌ക്കാമെന്നും അറിയിക്കുകയായിരുന്നു.
ഇതോടെയാണ് വ്യാപാരി പത്തനംതിട്ട വിജിലൻസ് യൂണിറ്റിലെ ഡെപ്യൂട്ടി പോലീസ് സൂപ്രണ്ടിന് പരാതി നൽകിയത്. വിജിലൻസ് സംഘം മഷി പുരട്ടിയ 5,000 രൂപ വ്യാപാരിക്ക് കൈമാറി. ഈ പണം താജുദ്ദീന് നൽകാനായിരുന്നു നിർദേശം.
ശനിയാഴ്ച വൈകിട്ട് അഞ്ചരയോടെ അയിരൂർ ജില്ലാ ആയുർവേദ ആശുപത്രിക്ക് സമീപം വെച്ച് വ്യാപാരി താജുദ്ദീന് പണം കൈമാറി. പണം സ്വീകരിച്ച ഉടൻ സ്ഥലത്തെത്തിയ വിജിലൻസ് ഉദ്യോഗസ്ഥർ ഇയാളെ പിടികൂടുകയായിരുന്നു. കൈക്കൂലിയായി വാങ്ങിയ 5,000 രൂപയും പിടിച്ചെടുത്തു.
അറിയപ്പെടുന്ന മിമിക്രി കലാകാരനായ താജുദ്ദീന്റെ പേരിൽ നേരത്തേയും പണപ്പിരിവ് സംബന്ധിച്ച് പരാതികളുള്ളതായി അറിയുന്നു. അസിസ്റ്റന്റ് സെക്രട്ടറിയായി ഉദ്യോഗക്കയറ്റം പ്രതീക്ഷിച്ചിരിക്കെയാണ് താജുദ്ദീൻ കൈക്കൂലി കേസിൽ വിജിലൻസിന്റെ പിടിയിലായത്.
SUMMARY: Rs 5,000 bribe to renew a fish trader’s license; Vigilance nabs Panchayat head clerk, who is also a mimicry artist.
