ബെംഗളൂരു: മൈസൂരു റെയിൽവേ യാർഡിൽ നടക്കുന്ന സുരക്ഷാ ജോലികളെ തുടർന്ന് ഇന്ന് ബെംഗളൂരു–മൈസൂരു റൂട്ടിൽ ഉൾപ്പെടെ നിരവധി ട്രെയിൻ സർവീസുകളിൽ മാറ്റം വരുത്തി. ചില ട്രെയിനുകൾ പൂർണമായും റദ്ദാക്കിയപ്പോൾ ചില സർവീസുകൾ ഭാഗികമായി റദ്ദാക്കുകയും വഴിതിരിച്ചുവിടുകയും ചെയ്തിട്ടുണ്ട്.
ഇന്ന് സർവീസ് നടത്തേണ്ട 56232 എസ്.എം.വി.ടി. ബെംഗളൂരു–മൈസൂരു പാസഞ്ചർ ട്രെയിൻ റദ്ദാക്കിയിട്ടുണ്ട്.
അതേസമയം 66553 കെ.എസ്.ആർ. ബെംഗളൂരു–അശോകപുരം മെമു ട്രെയിൻ ഇന്ന് അശോകപുരത്തിന് പകരം പാണ്ഡവപുരം വരെ മാത്രമേ സർവീസ് നടത്തൂ. തിരിച്ചുള്ള 66580 അശോകപുരം–കെ.എസ്.ആർ. ബെംഗളൂരു മെമു സർവീസും പാണ്ഡവപുരത്തുനിന്നായിരിക്കും ആരംഭിക്കുക.
ഇതിന് പുറമെ 16585 എസ്.എം.വി.ടി. ബെംഗളൂരു–മുർദേശ്വർ എക്സ്പ്രസ് ഇന്ന് പതിവ് പാതയ്ക്ക് പകരം നെലമംഗല–ശ്രവണബെലഗോള–ഹാസൻ വഴിയാണ് സർവീസ് നടത്തുക. ഇതോടെ കെങ്കേരി, രാമനഗരം, ചന്നപട്ടണ, മാണ്ഡ്യ, മൈസൂരു, കൃഷ്ണരാജനഗര തുടങ്ങിയ സ്റ്റേഷനുകളിൽ ഈ ട്രെയിനിന് ഇന്നത്തെ യാത്രയിൽ സ്റ്റോപ്പ് ഉണ്ടായിരിക്കില്ല.
മൈസൂരു യാർഡിലെ സുരക്ഷാ ജോലികൾ പൂർത്തിയാക്കുന്നതിന്റെ ഭാഗമായാണ് താൽക്കാലിക നിയന്ത്രണങ്ങൾ ഏർപ്പെടുത്തിയിരിക്കുന്നത്. നാളെയും ചില സർവീസുകളിൽ മാറ്റങ്ങളുണ്ടാകും. യാത്രക്കാർ സ്റ്റേഷനിലേക്ക് പുറപ്പെടുന്നതിന് മുമ്പ് തങ്ങളുടെ ട്രെയിനിന്റെ പുതുക്കിയ സമയവും സർവീസ് നിലയും പരിശോധിക്കണമെന്ന് അധികൃതർ നിർദേശിച്ചു.
SUMMARY: Train restrictions on the Mysuru-Bengaluru route today; some services cancelled.
