കോഴിക്കോട്: വിഖ്യാത കളിയെഴുത്തുകാരൻ ഭാസി മലാപ്പറമ്പ് അന്തരിച്ചു. 85 വയസ്സായിരുന്നു. വാർധക്യസഹജമായ അസുഖങ്ങളെ തുടർന്ന് കോഴിക്കോട്ടെ വസതിയിൽ രാത്രി 9 മണിയോടെയായിരുന്നു അന്ത്യം. ഇന്ത്യയിൽ നിന്ന് ഏറ്റവും കൂടുതൽ ഫിഫ ലോകകപ്പുകൾ നേരിട്ട് കവർ ചെയ്ത മാധ്യമപ്രവർത്തകരിൽ പ്രധാനിയാണ് അദ്ദേഹം. 1982-ലെ സ്പാനിഷ് ലോകകപ്പ് മുതൽ വിവിധ പതിപ്പുകളിൽ ഫിഫ ലോകകപ്പ് മത്സരങ്ങൾ അദ്ദേഹം നേരിട്ട് റിപ്പോർട്ട് ചെയ്തിട്ടുണ്ട്. 2014 ലെ ബ്രസീൽ ലോകകപ്പ് ഉൾപ്പെടെ റിപ്പോർട്ട് ചെയ്തു. മറഡോണയുടെ ദൈവത്തിൻ്റെ കൈ ഗോൾ, 2006 ലോകകപ്പിൽ സിദാൻ മറ്റരാസിയെ തലകൊണ്ട് ഇടിച്ച സംഭവം എന്നിവ നേരിൽ കണ്ട് റിപ്പോർട്ട് ചെയ്തു.
മലാപ്പറമ്പ് കുളങ്ങരക്കണ്ടി ചന്തുക്കുട്ടിയുടെയും ചിരുതക്കുട്ടിയുടെയും മകനായി ജനിച്ചു. വിദ്യാഭ്യാസത്തിനുശേഷം പൊതുമരാമത്തു വകുപ്പിൽ എൻജിനീയറായി. 1996ൽ ആണു വിരമിച്ചത്. കോഴിക്കോട്ടെ പ്രാദേശിക ഫുട്ബോളിൽ ഒരു കാലത്ത് മികച്ച താരമായിരുന്നു. യങ്ങ് ചാലഞ്ചേഴ്സ് ക്ലബ് ക്യാപ്റ്റൻ ആയിരുന്നു. കോഴിക്കോട്ടെ പ്രശസ്തമായ നാഗ്ജി ഫുട്ബോൾ ടൂർണ്ണമെൻ്റിൽ നിരവധി തവണ കളിച്ചിട്ടുണ്ട്. പെലെയെ നേരിൽക്കാണാനും സംസാരിക്കാനും കഴിഞ്ഞു. അദ്ദേഹം നൽകിയ ഓട്ടോഗ്രാഫും ഭാസി മലപ്പറമ്പിൻ്റെ കൈവശമുണ്ട്. പ്രശസ്ത ഫുട്ബോൾ താരങ്ങളായ ബോബി മൂർ, ബോബി ചാർട്ടൺ, പീറ്റർ ഷിൽട്ടൺ തുടങ്ങിയവരുടെ അഭിമുഖം നടത്തി.
1972ൽ പുറത്തിറങ്ങിയ ഫുട്മ്പോൾ ചാമ്പ്യൻ എന്ന സിനിമയിൽ അഭിനയിച്ചു. കോഴിക്കോട് നഗരത്തിലെ വിവിധ സാമൂഹ്യ സാംസ്കാരിക കലാ രംഗങ്ങളിലെ സജീവസാന്നിധ്യമായിരുന്നു അസുഖം വരും വരെ ഭാസി മലാപ്പറമ്പ്. സാഹിത്യരംഗത്തും തന്റേതായ കൈയൊപ്പുചാർത്തി. നോവൽ, ബാലസാഹിത്യം, സ്‌പോർട്‌സ്‌ എന്നീ വിഭാഗങ്ങളിലായി 16 കൃതികൾ രചിച്ചിട്ടുണ്ട്‌. വൃന്ദ, മനസ്സുകൾ സാഗരങ്ങൾ, അന്പിളിച്ചോല, സുഷമയുടെ ഒളിന്പിക്‌ പർവ്വം (നോവൽ), മുരളി പുതിയ ക്ഷേത്രങ്ങൾ (ബാലസാഹിത്യം), പ്രതീക്ഷയുടെ പൂക്കട (ചെറുകഥാസമാഹാരം), ലോകകപ്പ് ഫുട്ബോൾ, ലോകകപ്പ് ഫുട്ബോൾ ഒരുചരിത്രാവലോകനം, കോഴിക്കോടിന്റെ കായിക പൈതൃകം എന്നീപുസ്‌തകങ്ങൾ രചിച്ചു. സംസ്കാരം നാളെ വൈകിട്ട് ആറിന് മാവൂർ റോഡ് ശ്മശാനത്തിൽ.
SUMMARY: Renowned football journalist and writer Bhasi Malaparamba has passed away.
