എറണാകുളത്തേക്കും കാസറഗോട്ടേക്കും ‘പല്ലക്കി’ല്‍ യാത്ര ചെയ്യാം; പ്രതിദിന സര്‍വീസുമായി കര്‍ണാടക ആര്‍ടിസി

ബെംഗളൂരു: ബെംഗളൂരുവിൽ നിന്ന് എറണാകുളം, കാസറഗോഡ് എന്നിവിടങ്ങളിലേക്കു പ്രതിദിന നോൺ എസി പല്ലക്കി സ്ലീപ്പർ ബസ് സർവീസുമായി കർണാടക ആർടിസി.

എറണാകുളത്തെക്കുള്ള സര്‍വീസ് ശാന്തിനഗർ ടെർമിനലിൽ നിന്നു രാത്രി 8.36നു പുറപ്പെട്ടു സേലം, കോയമ്പത്തൂർ, പാലക്കാട്, തൃശൂർ വഴി രാവിലെ 7ന് എറണാകുളത്തെത്തും. തിരിച്ചുള്ള സര്‍വീസ് എറണാകുളത്തു നിന്നു രാത്രി 7.02നു പുറപ്പെട്ടു തൃശൂർ, പാലക്കാട് വഴി രാവിലെ 6നു മജസ്റ്റിക് ബസ് ടെർമിനലിലെത്തും. 1264 രൂപയാണ് ടിക്കറ്റ് ചാർജ്.

കാസറഗോട്ടേക്കുള്ള പല്ലക്കി സര്‍വീസ് ശാന്തിനഗർ ടെർമിനലിൽ നിന്നു രാത്രി 8നു പുറപ്പെട്ടു സാറ്റലൈറ്റ്, മൈസൂരു, സുള്ള്യ, മുള്ളേരിയ വഴി രാവിലെ 5.45നു കാസറഗോട്ടേക്ക് എത്തിച്ചേരും. കാസറഗോഡ് നിന്നു രാത്രി 9നു പുറപ്പെട്ടു മുള്ളേരിയ സുള്ള്യ, മൈസൂരു വഴി രാവിലെ 5.50നു ശാന്തിനഗറിലെത്തും. 1000 രൂപയാണ് ടിക്കറ്റ് ചാർജ്.

എറണാകുളത്തേക്കു നേരത്തെ ഉണ്ടായിരുന്ന രാജഹംസ നോൺ എസി സീറ്റർ ബസിനു പകരമാണ് 30 ബെർത്തുകളുള്ള സ്ലീപ്പർ ബസ് അനുവദിച്ചത്. കാസറഗോട്ടേക്ക് നേരത്തെ സര്‍വീസ് നടത്തിയിരുന്ന നോണ്‍ എസി സ്ലീപ്പര്‍ ബസിന് പകരമാണ് പുതിയ പല്ലക്ക് സര്‍വീസ്. നിലവില്‍ മള്‍ട്ടി ആക്സില്‍ എസി വോള്‍വോ ബസ് കൂടി കാസറഗോട്ടേക്ക് സര്‍വീസ് നടത്തുന്നുണ്ട്.

ടിക്കറ്റ് ബുക്കിങ്ങിന്: ksrtc.in

SUMMARY: You can travel to Ernakulam and Kasaragod by ‘Pallakk’; Karnataka RTC with daily service