തിരുവനന്തപുരം: വയനാട് ഉരുൾപൊട്ടലിലെ ദുരന്തബാധിതര്ക്ക് താമസിക്കാന് പൊതുമരാമത്ത് വകുപ്പിന്റെ ക്വാട്ടേഴ്സുകള് നൽകുമെന്ന് മന്ത്രി പി. എ. മുഹമ്മദ് റിയാസ് അറിയിച്ചു. ദുരന്തത്തെ അതിജീവിച്ചവരുടെ പുനരധിവാസം പൂര്ത്തിയാകുന്നതുവരെ ഇവരെ താമസിപ്പിക്കാൻ പ്രത്യേക സംവിധാനം ഒരുക്കും. പൊതുമരാമത്ത് വകുപ്പിന്റെ ഒഴിഞ്ഞുകിടക്കുന്ന ക്വാട്ടേഴ്സുകളിലേക്ക് ഇവരെ ഉടൻ മാറ്റുമെന്ന് മന്ത്രി ഉറപ്പുനല്കി.
ഇതോടൊപ്പം വയനാട്ടില് തിരച്ചില് ഉടന് നിര്ത്തില്ലെന്ന് മന്ത്രി പറഞ്ഞു. കാണാതായവരെ കണ്ടെത്താന് സാധ്യതകളൊന്നും ബാക്കി നിര്ത്താതെയുള്ള തിരച്ചിലാണ് ഇതുവരെയും നടത്തിയത്. ഇതിന്റെ ഭാഗമായി ഉരുള്പൊട്ടലിന്റെ പ്രഭവകേന്ദ്രമായ പുഞ്ചിരിമട്ടം മുതല് ഊര്ജിതമായ തിരച്ചിലാണ് നടക്കുന്നത്. പുഞ്ചിരിമട്ടം, മുണ്ടക്കൈ, ചൂരല്മല ഭാഗത്തും സൂചിപ്പാറ വെള്ളച്ചാട്ടം മുതല് പോത്തുകല്ല്, നിലമ്പൂര് വരെ ചാലിയാര് കേന്ദ്രീകരിച്ചുമാണ് ഇന്ന് തിരച്ചില് നടന്നത്.
പരിശോധിക്കാത്ത ഒരു പ്രദേശവും ഈ മേഖലയിലുണ്ടാകരുതെന്ന ലക്ഷ്യത്തോടെയാണ് മുമ്പോട്ട് പോകുന്നത്. തിരച്ചിലിനായി നാട്ടുകാരുടെയും സന്നദ്ധപ്രവര്ത്തകരുടെയും ഭാഗത്തു നിന്ന് വലിയ സഹായമാണ് ലഭിച്ചു കൊണ്ടിരിക്കുന്നത്.
TAGS: WAYANAD | LANDSLIDE
SUMMARY: Wayanad landslide victims to be shifted to pwd quarters soon says minister
