എആർഎം സിനിമയുടെ വ്യാജപതിപ്പ് പുറത്തിറക്കിയ സംഭവത്തിൽ സിനിമാ പൈറസി സംഘമായ തമിഴ് റോക്കേഴ്സിനെ കുറിച്ച് കൂടുതൽ വിവരങ്ങൾ പുറത്തുവിട്ട് പോലീസ്. തമിഴ് റോക്കേഴ്സ് ഭൂരിഭാഗവും സിനിമകൾ പകർത്തുന്നത് തമിഴ്നാട്, ബെംഗളൂരു എന്നിവിടങ്ങളിലെ തിയറ്ററുകളില് വെച്ചാണെന്ന് പോലീസ് പറഞ്ഞു. മിക്ക പകർത്തലുകളും നടന്നിട്ടുള്ളത് കേരളത്തിനു പുറത്തുള്ള തിയറ്ററുകളിലാണ്.
കോയമ്പത്തൂർ എസ്ആർകെ തിയേറ്ററിൽ വെച്ചായിരുന്നു എആർഎം വ്യാജ പതിപ്പിന്റെ ചിത്രീകരണം. ഇവരെ പിടികൂടുന്നത് വേട്ടയ്യൻ സിനിമയുടെ വ്യാജനു വേണ്ടി ചിത്രീകരണം നടത്തി തിയറ്ററിൽ നിന്ന് മടങ്ങുമ്പോഴായിരുന്നു. തമിഴ്നാട് സത്യമംഗലം സ്വദേശികളായ കുമരേശും, പ്രവീണ് കുമാറുമാണ് പിടിയിലായത്.
ബെംഗളൂരുവിലെ ഗോപാലൻ മാളിൽ നിന്നാണ് ഇവർ പിടിയിലായത്. ഇവർ വേട്ടയ്യൻ സിനിമയുടെ വ്യാജ പകർപ്പ് എടുത്ത ശേഷം തിയേറ്റർ വിടുന്ന ഘട്ടത്തിലായിരുന്നു കേരളാ പോലീസ് സംഘം തടഞ്ഞത്. തമിഴ് റോക്കേഴ്സ് സംഘം സിനിമകളുടെ വ്യാജ പതിപ്പുകൾ തിയറ്ററുകളിൽ വെച്ച് ചിത്രീകരിക്കുന്നതിന് പ്രത്യേക മുന്നൊരുക്കങ്ങൾ നടത്താറുണ്ടെന്ന് പോലീസ് പറഞ്ഞു. റിക്ലൈനർ സീറ്റുകളുള്ള തിയറ്ററുകളാണ് വ്യാജ പതിപ്പ് ചിത്രീകരണത്തിന് തിരഞ്ഞെടുക്കുക. കിടന്നുകൊണ്ട് ചിത്രീകരണം നടത്തും. നഗരങ്ങളിലെ ഇത്തരം തിയറ്ററുകളില് വെച്ച് നൂറുകണക്കിന് സിനിമകളാണ് സംഘം ചിത്രീകരിച്ച് ചോർത്തിയതെന്നാണ് പോലീസിന്റെ കണ്ടെത്തൽ.
TAGS: KERALA | ARREST
SUMMARY: More details revealed by police in Tamil rockers team
