ബെംഗളൂരു: കർണാടകയിലെ സ്കൂളുകളിൽ 17 ലക്ഷം വ്യാജ വിദ്യാർഥികളുണ്ടെന്ന സംശയത്തിൽ സ്കൂൾ വിദ്യാഭ്യാസ വകുപ്പ്. കഴിഞ്ഞ 2 വർഷത്തിനിടെ മുഴുവൻ വിദ്യാർഥികളുടെയും ആധാർ വിവരങ്ങൾ ലിങ്ക് ചെയ്യണമെന്ന് വകുപ്പ് നിർദേശം നൽകിയിരുന്നു. പല തവണ ഇതിനുള്ള സമയപരിധി പുതുക്കി നൽകിയിട്ടും ലക്ഷക്കണക്കിനു പേരുടെ വിവരങ്ങൾ ഇതുവരെയും ലഭ്യമായിട്ടില്ല. സംസ്ഥാനത്ത് 1 മുതൽ 10 വരെ ക്ലാസുകളിൽ 1.04 കോടി വിദ്യാർഥികൾ പഠിക്കുന്നുണ്ടെന്നാണ് കണക്ക്. എന്നാൽ 87 ലക്ഷം പേർമാത്രമാണ് ആധാർ ലിങ്ക് ചെയ്തത്.
വിദ്യാർഥികൾക്കായി സർക്കാർ നൽകുന്ന ആനുകൂല്യങ്ങൾ തട്ടിയെടുക്കാൻ സ്കൂൾ അധികൃതർ വ്യാജ പേരിൽ അഡ്മിഷനുകൾ എടുത്തതായാണ് നിഗമനം. അവസാന നടപടിയായി ജൂലൈ 30നകം ആധാർ ലിങ്ക് ചെയ്യണമെന്ന കർശന നിർദേശം അധികൃതർ നൽകിയിട്ടുണ്ട്. ഇതു കഴിയുന്നതോടെ വിശദ അന്വേഷണം നടത്തി കുറ്റക്കാരെ കണ്ടെത്താനാണ് ശ്രമിക്കുന്നത്.
SUMMARY: Susupicion of 17 lakh fake students in Karnataka schools
