ബെംഗളൂരു: നഗരത്തിലെ ഗതാഗതക്കുരുക്ക് കുറയ്ക്കാനും അടിസ്ഥാനസൗകര്യങ്ങൾ മെച്ചപ്പെടുത്താനും 500 കിലോമീറ്റർ പുതിയ റോഡുകൾ ഉൾപ്പെടുന്ന വിപുലമായ വികസനപദ്ധതിയുമായി കർണാടക സർക്കാർ. അടുത്ത പത്തുവർഷത്തേക്കുള്ള ബെംഗളൂരുവിന്റെ വികസനരേഖയുടെ ഭാഗമായി ഏകദേശം ഒരു ലക്ഷം കോടി രൂപ ചെലവുവരുന്ന പദ്ധതികളാണ് സർക്കാർ ആസൂത്രണം ചെയ്യുന്നത്. മുഖ്യമന്ത്രി ഡി.കെ. ശിവകുമാർ നഗരത്തിലെ എം.എൽ.എമാരുമായും എം.എൽ.സിമാരുമായും നടത്തിയ യോഗത്തിലാണ് റോഡ്, മെട്രോ, തുരങ്കപാത, പൊതുഗതാഗതം എന്നിവയുമായി ബന്ധപ്പെട്ട നിർദേശങ്ങൾ വിശദീകരിച്ചത്.
പുതിയ റോഡുകൾ നിർമിക്കുന്നതിനൊപ്പം നിലവിലുള്ള പ്രധാന റോഡുകളുടെ ശേഷി വർധിപ്പിക്കാനും സർക്കാർ ലക്ഷ്യമിടുന്നു. നഗരത്തിലെ പ്രധാന റോഡുകളും ഉപപ്രധാന റോഡുകളുമായി ബന്ധപ്പെട്ട 1,500 കിലോമീറ്റർ പാതകൾ നവീകരിക്കാനും 17 കിലോമീറ്റർ ഔട്ടർ റിങ് റോഡ് പുനർവികസിപ്പിക്കാനും പദ്ധതിയുണ്ട്. മഴവെള്ളച്ചാലുകൾക്ക് സമീപം ഏകദേശം 300 കിലോമീറ്റർ ബഫർ റോഡുകൾ ഒരുക്കുന്നതും പുതിയ റോഡ് ബന്ധങ്ങൾ വികസിപ്പിക്കുന്നതിന്റെ ഭാഗമാണ്.
നഗരത്തിലെ തിരക്കേറിയ മേഖലകളിൽ ഗതാഗതം സുഗമമാക്കാൻ 120 കിലോമീറ്റർ നീളത്തിൽ എലിവേറ്റഡ് റോഡ് ശൃംഖല നിർമിക്കാനാണ് നിർദേശം. ഇതിന് ഏകദേശം 23,165 കോടി രൂപ ചെലവാകുമെന്നാണ് കണക്കാക്കുന്നത്. ദേശീയപാതാ മാനദണ്ഡങ്ങൾ പരിഗണിച്ചാണ് പാതകൾ ആസൂത്രണം ചെയ്യുന്നത്. പത്തുകിലോമീറ്ററിൽ താഴെയുള്ള ചില ഭാഗങ്ങളിൽ ടോൾ ഈടാക്കില്ലെന്നും അതിൽ കൂടുതലുള്ള ഭാഗങ്ങളിൽ ടോൾ ബാധകമാകാമെന്നും മുഖ്യമന്ത്രി വ്യക്തമാക്കിയതായി റിപ്പോർട്ടുകൾ പറയുന്നു.
ബെംഗളൂരുവിലെ ഗതാഗതക്കുരുക്ക് കുറയ്ക്കുന്നതിനായി 40 കിലോമീറ്റർ തുരങ്കപാതയും പദ്ധതിയിലുണ്ട്. ഇതിൽ വടക്ക്–തെക്ക് ദിശയിലുള്ള 16.5 കിലോമീറ്റർ പാതയ്ക്കും കിഴക്ക്–പടിഞ്ഞാറ് ദിശയിലുള്ള ഏകദേശം 21 കിലോമീറ്റർ പാതയ്ക്കും നിർദേശങ്ങളുണ്ട്. വടക്ക്–തെക്ക് പാതയ്ക്ക് ഏകദേശം 17,780 കോടി രൂപ ചെലവാകുമെന്നാണ് റിപ്പോർട്ട്.
നഗരത്തിലെ മെട്രോ ശൃംഖല നിലവിലുള്ള ഏകദേശം 96 കിലോമീറ്ററിൽനിന്ന് 2027-ഓടെ 170 കിലോമീറ്ററായി വികസിപ്പിക്കുകയാണ് ലക്ഷ്യമെന്ന് മുഖ്യമന്ത്രി അറിയിച്ചു. കൂടാതെ 4,500 ബസുകൾ കൂടി നിരത്തിലിറക്കാനും 2030-ഓടെ 150 കിലോമീറ്റർ സബർബൻ റെയിൽ ബന്ധം വികസിപ്പിക്കാനും പദ്ധതിയുണ്ട്. മെട്രോ, ബസ്, സബർബൻ റെയിൽ സംവിധാനങ്ങൾ തമ്മിലുള്ള ബന്ധം മെച്ചപ്പെടുത്തുന്നതിലൂടെ സ്വകാര്യ വാഹനങ്ങളെ ആശ്രയിക്കുന്നത് കുറയ്ക്കാനാകുമെന്നാണ് പ്രതീക്ഷ.
SUMMARY: 500 km of new roads in Bengaluru; development project worth ₹1 lakh crore
