തിരുവനന്തപുരം: ആറ്റുകാൽ പൊങ്കാലക്കിടെ മാല മോഷ്ടിക്കാൻ ശ്രമിച്ച തമിഴ്നാട്ടിൽ നിന്നുള്ള നാലംഗ സംഘം പിടിയിൽ. മേട്ടുപ്പാളയം സ്വദേശിനികളായ റോസ്നി, മീനാക്ഷി, ശാന്തി, മീന എന്നിവരാണ് പോലീസിന്റെ പിടിയിലായത്.
പൊങ്കാലയിടാനെന്ന വ്യാജേന തലസ്ഥാനത്തെത്തിയ പ്രതികളിൽ ഒരാൾ നടത്തിയ മോഷണ ശ്രമത്തെ തുടർന്നാണ് കവർച്ച സംഘം പിടിയിലായത്.
സംഭാരം വാങ്ങാനുള്ള ക്യൂവിൽ നിൽക്കുമ്പോഴാണ് മാല മോഷ്ടിക്കാൻ ശ്രമിച്ചത്.ഉടൻ‌തന്നെ സംഘത്തിലെ ഒരാൾ പിടിയിലായി. തുടർന്ന് പോലീസ് നടത്തിയ പരിശോധനയിൽ ഇവർ സംഘമായി എത്തിയതാണെന്ന് മനസിലായി. പിന്നാലെയാണ് മറ്റ് മൂന്ന് പേരെയും പിടികൂടിയത്. എന്നാൽ പ്രതികൾ പരസ്പര ബന്ധമില്ലാത്ത തരത്തിലാണ് മൊഴി നൽകുന്നതെന്ന് പോലീസ് അറിയിച്ചു. നേരത്തെയും ഇവർ സമാനക്കേസുകളിൽ പ്രതികളാണ്. ഇവരെ കോടതിയിൽ ഹാജരാക്കി റിമാൻഡ് ചെയ്തിരിക്കുകയാണ്.
SUMMARY: Attempted theft during Pongala at Aattukal; Four arrested
