പാലക്കാട്: നിയമസഭാ തിരഞ്ഞെടുപ്പില് ഒറ്റപ്പാലത്ത് എൻ.ഡി.എ സ്ഥാനാർഥിയായി മേജർ രവി എത്തിയേക്കും. മണ്ഡലത്തിലെ വിവിധ കേന്ദ്രങ്ങള് സിനിമാതാരം കൂടിയായ മേജർ രവി സന്ദർശിച്ചു. മേജർ രവിയുടെ സിനിമാരംഗത്തെ താരമൂല്യവും പൊതുസമ്മതിയും മണ്ഡലത്തില് വലിയ മുന്നേറ്റമുണ്ടാക്കാൻ സഹായിക്കുമെന്നാണ് എൻ.ഡി.എ നേതൃത്വത്തിന്റെ വിലയിരുത്തല്.
കഴിഞ്ഞ രണ്ട് നിയമസഭാ തിരഞ്ഞെടുപ്പുകളിലും കാല് ലക്ഷത്തിലധികം വോട്ടുകള് നേടാൻ കഴിഞ്ഞത് മണ്ഡലത്തില് ബി.ജെ.പിക്ക് വലിയ ആത്മവിശ്വാസം നല്കുന്നുണ്ട്. വട്ടിയൂർകാവില് മുൻ ഡിജിപി ആർ ശ്രീലേഖ ബിജെപി സ്ഥാനാർത്ഥിയാകും. ഇന്ന് രാവിലെ പത്തരക്ക് ശ്രീലേഖ മണ്ഡലത്തില് ചുവരെഴുത്ത് തുടങ്ങുമെന്ന് പാർട്ടി അറിയിച്ചു. ശ്രീലേഖയോട് മണ്ഡലത്തില് സജീവമാകാൻ ബിജെപി നിർദ്ദേശിച്ചു.
തദ്ദേശ തിരഞ്ഞെടുപ്പില് ശാസ്തമംഗലം വാർഡില് നിന്ന് ജയിച്ച ശ്രീലേഖക്ക് മേയറാകാത്തതില് പരിഭവമുണ്ട്. സമവായത്തിന്റെ ഭാഗമായി വട്ടിയൂർകാവില് സീറ്റ് നല്കാമെന്ന് പാർട്ടി ഉറപ്പ് നല്കിയിരുന്നു. സിറ്റിംഗ് എംഎല്എ വികെ പ്രശാന്ത് ഇടത് സ്ഥാനാർഥിയാകുമെന്നുറപ്പാണ്. മണ്ഡലം തിരിച്ചുപിടിക്കാൻ കോണ്ഗ്രസ് കെ മുരളീധരനെ ഇറക്കുന്നതോടെ വട്ടിയൂർകാവില് ശക്തമായ ത്രികോണപ്പോര് ഉറപ്പായി.
SUMMARY: Major Ravi may become NDA candidate in Ottapalam
