പാലക്കാട്: കേരളം മാറ്റത്തിന്റെ പാതയിലാണെന്നും പാലക്കാട് ബിജെപിക്ക് സംസ്ഥാനത്തേക്കുള്ള കവാടമാണെന്നും പ്രധാനമന്ത്രി നരേന്ദ്ര മോദി. എൻഡിഎ സ്ഥാനാർത്ഥികളുടെ തിരഞ്ഞെടുപ്പ് പ്രചാരണത്തിന്റെ ഭാഗമായി പാലക്കാട് കോട്ടമൈതാനത്ത് നടന്ന വൻ പൊതുസമ്മേളനത്തില്‍ സംസാരിക്കുകയായിരുന്നു അദ്ദേഹം. മേഴ്‌സി കോളേജ് ഗ്രൗണ്ടില്‍ ഹെലികോപ്‌ടറില്‍ വന്നിറങ്ങിയ മോദി ആയിരക്കണക്കിന് പ്രവർത്തകരെ അഭിവാദ്യം ചെയ്യുന്ന റോഡ്ഷോയായാണ് എൻഡിഎ പൊതുസമ്മേളനം നടക്കുന്ന കോട്ടമൈതാനത്ത് എത്തിയത്.
ബിജെപി തങ്ങളുടെ എ ക്ലാസ് മണ്ഡലമായി പ്രഖ്യാപിച്ച്‌ ശക്തമായ പ്രചാരണം നടത്തുന്ന സ്ഥലമാണ് പാലക്കാട്. ജില്ലയിലെ 12 മണ്ഡലങ്ങളിലെയും എൻഡിഎ സ്ഥാനാർഥികള്‍ പൊതുസമ്മേളനത്തില്‍ പങ്കെടുക്കുന്നുണ്ട്. ആയിരക്കണക്കിനുപേരാണ് പ്രധാനമന്ത്രിയെ കാണുന്നതിനായി കോട്ടമൈതാനത്ത് തടിച്ചുകൂടിയത്. വേദിയില്‍ പ്രവർത്തകരെ തൊഴുകൈകളോടെ അഭിവാദ്യം ചെയ്‌ത മോദി ചെണ്ടകൊട്ടി ജനങ്ങളെ ആവേശത്തിലാക്കി.
പാലക്കാട്ടെ പൊതുസമ്മേളനത്തിന് ശേഷം തൃശൂരിലേക്ക് പോകുന്ന പ്രധാനമന്ത്രി അവിടെ നടക്കുന്ന വമ്പൻ റോഡ് ഷോയിലും പങ്കുചേരും. കേരളത്തില്‍ ബിജെപിയുടെ രാഷ്ട്രീയ മുന്നേറ്റത്തിന് പാലക്കാട്ടെ ഈ സന്ദർശനം വലിയ കരുത്താകുമെന്നാണ് വിലയിരുത്തപ്പെടുന്നത്.
SUMMARY: ‘Palakkad is BJP’s gateway to Kerala’; PM Narendra Modi says state on path of change
