തിരുവനന്തപുരം: കേരള ആരോഗ്യ-ശാസ്ത്ര സര്‍വകലാശാല സൗത്ത് സോണ്‍ കലോത്സവത്തിനിടയിലുണ്ടായ സംഘര്‍ഷത്തില്‍ നാല് പേരെ പാരിപ്പള്ളി പോലീസ് അറസ്റ്റ് ചെയ്തു. പാരിപ്പള്ളി കോട്ടയ്‌ക്കേറം സ്വദേശികളായ വിഷ്ണു (38), രാജേഷ് (33), ദീപു കൃഷ്ണ (34), ആരോമല്‍ (29) എന്നിവരാണ് അറസ്റ്റിലായത്.
കൊല്ലം പാരിപ്പള്ളി മെഡിക്കല്‍ കോളജില്‍ വെച്ചു നടന്ന കലോത്സവത്തിനിടെ കഴിഞ്ഞ ദിവസമാണ് സംഭവം. പുറത്തുനിന്ന് കുറച്ചുപേർ എത്തി അക്രമം അഴിച്ചുവിടുകയായിരുന്നു. ഹോക്കി സ്റ്റിക്കും ക്രിക്കറ്റ് ബാറ്റും അടക്കമുള്ളവ കൊണ്ടാണ് മർദിച്ചതെന്ന് വിദ്യാർഥികൾ പരാതിയിൽ പറയുന്നു. കലോത്സവത്തിന്റെ സമാപനത്തിൽ സമ്മാനദാനത്തിനിടെയാണ് കൂട്ടത്തല്ലുണ്ടായത്. സംഭവത്തിൽ കണ്ടാലറിയാവുന്ന 25ഓളം പേർക്കെതിരെ കേസെടുത്തു. കെ എസ് യു പ്രവര്‍ത്തകരുടെ പരാതിയിലാണ് കേസെടുത്തത്.
സംഘര്‍ഷത്തില്‍ തിരുവനന്തപുരം മെഡിക്കല്‍ കോളജ് യൂണിയന്‍ ചെയര്‍മാന്‍ അമല്‍ദേവ് ഉള്‍പ്പെടെ ഇരുപതോളം വിദ്യാര്‍ഥികള്‍ക്ക് പരിക്കേറ്റിരുന്നു. കലോത്സവത്തില്‍ വിജയികളായ തിരുവനന്തപുരം മെഡിക്കല്‍ കോളജ് വിദ്യാര്‍ഥികള്‍ സമാപന സമ്മേളനത്തില്‍ ബാനര്‍ ഉയര്‍ത്തിയതാണ് സംഘര്‍ഷത്തിലേക്കു നയിച്ചത്.
SUMMARY: Clash during Health University arts festival; students injured, four arrested.
